Bilim berý mekemelerinde býllıngke qarsy ınnovatsııalyq júıe engiziledi
ASTANA. KAZINFORM — Digital Bridge-de mektepter men balabaqshalarda balalardy býllıngten qorǵaý jónindegi JI-startap usynyldy
Mektepter men balabaqshalardaǵy býllıng máselesi tehnologııalyq turǵyda sheshimin tapty. Qazaqstandyq Protector AI startapy agressııa faktilerin birden anyqtap, personalǵa habarlaıtyn JI negizindegi júıeni ázirlep shyǵardy. Digital Bridge 2025 forýmynda usynylǵan otandyq ónim Memleket basshysynyń balalardyń qaýipsizdigin qamtamasyz etý jáne quqyqtaryn qorǵaý jónindegi tapsyrmalaryn júzege asyrýdyń mańyzdy quraldarynyń birine aınaldy.
Bul júıe mektepterde, balabaqshalarda jáne basqa da mekemelerde burynnan bar beınekameralarǵa ornatylyp, oqıǵalarǵa ýaqtyly den qoımaý máselesin sheshýge kómektesedi. Jasandy ıntellekt beıne aǵyndardy naqty ýaqyt rejıminde taldap, agressıvti minez-qulyq belgileri anyqtalǵan kezde jaýapty adamdarǵa birden habarlama jiberedi. Onyń mańyzdy ereksheligi — barlyq derekter mekemeniń ózinde ornatylǵan ishki serverlerde óńdeledi, bul beıneniń ınternetke tarap ketýine jol bermeıdi.
Búgingi tańda atalǵan baǵdarlama mektepter, balabaqshalar jáne medıtsınalyq-áleýmettik ortalyqtar sııaqty elimizdegi 60-qa jýyq mekemege engizilgen. Bolashaqta tárbıeshilerdiń psıhoemotsıonaldy jaǵdaıyn anyqtaý jáne qarýdy taný sııaqty jańa modýlderdi qosý arqyly onyń fýnktsıonalyn keńeıtý josparlanýda.
— Býllıng máselesi, ókinishke qaraı, elimizdegi bilim berý mekemelerinde bar ekeni jasyryn emes. Bizdiń júıe jumys istep turǵan beınekameralarǵa ornatylady, jasandy ıntellekt beıne aǵyndaryn avtomatty túrde taldaıdy jáne jaýapty adamdarǵa agressıvti minez-qulyqtyń bar ekendigi týraly habarlaıdy, — dedi Protector AI kompanııasynyń jetekshisi Jasulan Salybaev.
Aıta ketelik Oljas Bektenov úzdik otandyq IT-jobalar men tsıfrlyq bastamalarǵa marapat tabys etken edi.