Bilim berý qyzmetiniń taǵy bir túri eGov portalyna shyǵaryldy

ASTANA. KAZINFORM – Tehnıkalyq jáne kásiptik bilim berý uıymdaryna qujat qabyldaý jalǵasýda. Endi abıtýrıentter kolledjge túsý úshin qujattaryn eGov portaly arqyly tapsyra alady, dep habarlaıdy QR Oqý-aǵartý mınıstrliginiń baspasóz qyzmeti.

Qujat tapsyrý kezinde portaldy qoldanýshy oqý tilin ján óńirdi tańdaı alady. Portalda avtomatty túrde abıtýrıenttiń bilimi, baǵalary jáne onyń sertıfıkatynyń jalpy baǵasy týraly aqparat shyǵarylady. Azamattardyń jeńildigi bar jekelegen sanattary úshin (І jáne ІІ toptaǵy múgedektigi bar adamdar, jetim balalar, ata-anasynyń qaraýynsyz qalǵan balalar, t.b.) júıe onyń mártebesi týraly qosymsha aqparatty kórsetedi.

Sonymen qatar ótinimniń mártebesin baqylap otyrý jáne qajet bolǵan jaǵdaıda ony keri qaıtaryp alý múmkindigi qarastyrylǵan. Atap ótý kerek, bir abıtýrıent 4 kolledjde 4 túrli mamandyqty tańdaı otyryp bir ǵana ótinim bere alady.

Abıtýrıent ótinimdi berý úshin eGov portalyna kirip, «Bilim» bólimindegi «Kolledjder» sanatyn tańdaýy tıis. Mundaǵy kórsetilgen barlyq kesteni toltyryp, faıldy júkteıdi jáne ETsQ arqyly qol qoıady.

Atap ótý kerek, kolledjderge qujattar qabyldaý 25 tamyzǵa deıin jalǵasady. Búgingi tańda 96 myńnan astam ótinim qabyldandy. Jańa oqý jylynda tegin tehnıkalyq jáne kásibı bilim berýmen 145 myń stýdent qamtylady dep josparlanýda.

Oqý-aǵartý mınıstrligi Tsıfrlyq damý, ınnovatsııa jáne aeroǵarysh ónerkásibi mınıstrligimen, «UAT» AQ-men jáne A.Baıtursynuly atyndaǵy «Taldaý» UZBBO birlesip atalǵan qyzmetti avtomattandyryp, iske qosty.