Bilim berý ınfraqurylymyn jetildirýge daıyn ınvestorlardy izdeımiz- Toqaev
ASTANA. KAZINFORM — Qazaqstan tehnıkalyq jáne kásiptik bilim berý sapasyn arttyrýǵa daıyn ınvestorlardy izdeıdi. Bul týraly QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Memleket basshysy Qasym-Jomart Toqaev aıtty.
«Ózderińiz de biletindeı, Qazaqstan qara jáne tústi metaldardy óndirý men eksporttaýda álemdik kóshbasshylardyń biri sanalady. Sonymen qatar, el áli de Qazaqstanda, jergilikti jerde óndirilýi múmkin qymbat taýarlar men jıyntyqtaýyshtardyń ımportyna aıtarlyqtaı dárejede táýeldi. Taıaýda qabyldanǵan Infraqurylymdy damytýdyń 2029 jylǵa deıingi ulttyq jospary jergilikti óndirýshiler úshin keń múmkindikter ashady. Quny 86 mıllıard dollardan astamǵa baǵalanatyn 200-ge jýyq aýqymdy ınfraqurylymdyq joba júzege asyrylady», — dedi Memleket basshysy.
Qasym-Jomart Toqaev Úkimet jetkizý kelisimsharttary negizinde jergiliktendirýge arnalǵan ónimderdiń tizimin jasaıtyndyǵyn aıtty.
«Ónerkásiptik ósim úshin joǵary bilikti jumys kúshi qajet. Sondyqtan da men 2025 jyldy jumysshy mamandyqtar jyly dep jarııaladym. Biz Qazaqstanda tehnıkalyq jáne kásiptik bilim berý sapasyn arttyrýǵa jáne bilim berý ınfraqurylymyn jetildirýge daıyn ınvestorlardy izdeımiz», — dedi Prezıdent.
