Bilim berý ınfraqurylymyn qoldaý qory esebinen 55 mektep paıdalanýǵa berildi - mınıstrlik

ASTANA. KAZINFORM – Bilim berý ınfraqurylymyn qoldaý qory qurylǵan ýaqyttan bastap elimizdiń birqatar óńirlerinde 92 myń oqýshy ornyna arnalǵan 82 mekteptiń qurylysy qarjylandyryldy, dep habarlaıdy QR Oqý-aǵartý mınıstrliginiń baspasóz qyzmeti.

Baspasóz qyzmetiniń málimetterine qaraǵanda, Memleket basshysynyń tapsyrmasy boıynsha qurylǵan Bilim berý ınfraqurylymyn qoldaý qory jemqorlardan tárkilengen qarajat esebinen tolyqtyrylyp keledi. Mektepterde oryn jetispeýshiligi máselesin sheshý úshin jańadan bilim berý uıymdaryn salý nemese jańǵyrtý, oǵan japsarlas qurylys salý júzege asyrylýda.

«Memleket balalar úshin jaıly ári qaýipsiz bilim berý ortasyn qalyptastyrýǵa erekshe kóńil bóledi. Búgingi tańda 70 myńǵa jýyq oryndyq 55 mektep paıdalanýǵa berildi. Jyl sońyna deıin taǵy 7 nysandy iske qosý josparlanýda», — dep atap ótti Infraqurylymdy damytý departamentiniń basqarma basshysy Jaıyq Maqsutov.

Osylaısha, 2024 jyldyń basynan beri 18 jańa mektep salyndy. Bul mektepterdiń basym bóligi Astana qalasynda jáne Mańǵystaý, Almaty, Jambyl oblystarynda ornalasqan. Jańa mektepterde jaıly bilim alý ortasyn qurý úshin qajetti jaǵdaılar jasalǵan. Atalǵan óńirlerdegi bul mektepterdiń qurylysy 9 bilim berý uıymynyń, onyń ishinde, 6 úsh aýysymdy, 2 apatty jáne 1 eski mekteptegi oryn tapshylyǵy máselesin sheshýge múmkindik berdi.

Osyǵan deıin memleketke qaıtarylǵan 2 mlrd teńgege Atyraýda mektep salynatyny týraly habarladyq.