Bilim berý grantyn bólýde kvota qarastyrylǵan: ony kimder alady
ASTANA. KAZINFORM – Konkýrs nátıjeleri jarııalanǵannan keıin túrli suraq týyndaýy zańdy. Osyǵan oraı Ǵylym jáne joǵary bilim mınıstrligi málimdeme jasady.
Memleket azamattardyń jekelegen sanattary úshin bilim berý granttaryn bólýde kvotalar qarastyrady. Olarǵa kópbalaly otbasylardan shyqqan balalar, jetim jáne ata-anasynyń qamqorlyǵynsyz qalǵan balalar, múgedektigi bar azamattar, aýyl jastary jáne zańnamada belgilengen basqa da sanattar jatady.
Mınıstrlik málimetinshe, kvota boıynsha konkýrs ótkizilip, eń joǵary nátıje kórsetken talapkerlerge grant beriledi.
– Ár kvota boıynsha talapkerler arasynda jeke konkýrs ótkiziledi. Sondyqtan ár sanattaǵy ótpeli baldyń ártúrli bolýy – grant sany men konkýrsqa qatysýshylardyń nátıjelerine baılanysty. Mańyzdysy, kvota grantty avtomatty túrde alýdy bildirmeıdi. Ár kvota sheńberinde de konkýrs ótkizilip, grant eń joǵary nátıje kórsetken talapkerlerge beriledi, - dedi mınıstrlikten.
Sonymen qatar QR ǴJBM Joǵary jáne joǵary oqý ornynan keıingi bilim berý komıteti tóraǵasynyń orynbasary Janna Esinbaeva túsindirgendeı, bilim berý grantyn alý baıqaýyna qatysý úshin úmitker Biryńǵaı ulttyq testileýden (UBT) belgilengen shekti ball jınaýy kerek. Degenmen joǵary oqý oryndary men bilim berý baǵdarlamalaryna qosymsha talaptar qoıylýy múmkin.
– Birinshiden, UBT-nyń belgilengen shekti bally baıqaýǵa qatysý úshin shart bolyp tabylatynyn eske salaıyn. Sonymen qatar naqty ótý baly tikeleı konkýrstyq bólý protsesinde anyqtalady jáne granttar sany men qatysýshylardyń nátıjelerine baılanysty bolady, - dep atap ótti spıker.
Ǵylym jáne joǵary bilim mınıstrligi UBT nátıjeleri teń bolǵan jaǵdaıda úmitkerlerdiń reti qalaı anyqtalatynyn bólek túsindirdi.
Mundaı jaǵdaılarda zańmen belgilengen artyqshylyq quqyǵy qoldanylady. Atap aıtqanda, teń daýys bolǵan jaǵdaıda kelesiler basymdyqqa ıe:
— «Altyn belgimen» marapattalǵandar;
— patrıotızmi men belsendi azamattyq ustanymy úshin tósbelgimen marapattalǵandar;
— biliktiligin rastaǵan jáne mamandyǵy boıynsha keminde bir jyldyq jumys tájirıbesi bar tehnıkalyq, kásiptik jáne joǵary oqý ornynan keıingi bilim berý mekemeleriniń túlekteri.
Eger osy krıterıılerdi qoldanǵannan keıin baldar teń bolyp qalsa, bilim berý qujatynyń (sertıfıkat, dıplom) ortasha baly eskeriledi. Eger baldar teń bolyp qalsa, tıisti pánder boıynsha nátıjeler eskeriledi.
Qazaqstandyq JOO-lar talapkerlerge 2 myńnan astam qosymsha grant usynǵanyn jazǵan edik.
