Bilim berý granty konkýrsyna ótinim qabyldaý 13 shildede bastalady

Qujattardy onlaın túrde 13 shilde saǵat 09:00-den 20 shilde saǵat 18:00-ge deıin tapsyrýǵa bolady.

Bıyl qyzmet jańartyldy. Endi júıe talapkerge memlekettik bilim berý grantynyń konkýrstan tys taǵaıyndalǵanyn avtomatty túrde tekseredi.

Tekserý Ulttyq testileý ortalyǵynyń málimetteri negizinde júrgiziledi. Eger talapkerge memlekettik bilim berý granty konkýrstan tys tártippen burynnan berilgen bolsa, júıe bul týraly ótinim berý kezinde habarlaıdy. Mundaı jaǵdaıda eGov.kz portaly nemese eGov Mobile qosymshasy arqyly qaıta ótinim tapsyrý qajet emes.

Qalǵan talapkerler ótinimdi jalpy tártippen beredi. Eger talapker jeńildik sanatyna jatsa, ótinim berý kezinde tıisti mártebe kórsetilip, avtomatty túrde rastalady.

Ótinimdi eGov.kz portaly arqyly berý úshin:

• portalǵa kirip, «Azamattarǵa» – «Bilim» – «Joǵary bilim» bólimin tańdaý;

• «Bilim berý granttaryn taǵaıyndaý, sondaı-aq joǵary jáne (nemese) joǵary oqý ornynan keıingi bilim berý uıymdarynda bilim alýshylarǵa áleýmettik qoldaý kórsetý» qyzmetine kirý;

• «Qyzmetke onlaın tapsyrys berý» batyrmasyn basý;

• qajetti derekterdi toltyryp, ótinimge qol qoıý;

• jeke kabınet arqyly ótinim mártebesin baqylaý qajet.

eGov Mobile qosymshasy arqyly ótinim berý tártibi de osyǵan uqsas.

Ótinim qabyldaý kezeńinde júkteme joǵary bolǵan jaǵdaıda eGov.kz portalynda elektrondyq kezek júıesi iske qosylady. Kezek kelgen kezde paıdalanýshyǵa qyzmet avtomatty túrde qoljetimdi bolady.

Kezekti baqylamaý úshin «Kezektiń jaqyndaǵany týraly SMS arqyly habarlaý» qyzmetin qosýǵa bolady. Habarlama mobıldi azamattar bazasynda tirkelgen telefon nómirine 1414 nómirinen jiberiledi.

Ótinim bergennen keıin talapker eGov.kz portalyndaǵy jeke kabınetinde bilim berý granty konkýrsyna qatysqany týraly elektrondyq anyqtama alady.

Konkýrs nátıjesi boıynsha bilim berý granty taǵaıyndalǵan jaǵdaıda elektrondyq sertıfıkat 10 tamyzdan keshiktirilmeı jeke kabınette qoljetimdi bolady. Al grant taǵaıyndalmaǵan jaǵdaıda bas tartý týraly habarlama jiberiledi.

Aıta keteıik, memlekettikten bólek qandaı bilim granttaryn utyp alýǵa bolatynyn mynaý silteme arqyly bile alasyz.