Bilim berý bıýdjeti oblystardan aýdandyq deńgeıge berilýi múmkin

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Májilis depýtatynyń saýalyna bergen jaýapta bilim berýge arnalǵan bıýdjetti oblystyq deńgeıden aýdandyq bıýdjetke berý týraly usynysqa jaýap berdi. 

 — Jobany taldaý oblystyq deńgeıde ortalyqtandyrylǵan qarjylandyrý birqatar eleýli qıyndyq týyndatatynyn kórsetti. Atap aıtqanda, ákimshilik júktemeniń artýy, qarjylyq operatsııalardyń kúrdelenýi, tótenshe jaǵdaılarǵa jedel den qoıýdyń baıaýlaýy, sonyń saldarynan bilim berý salasyn basqarý tıimdiliginiń tómendeýi jáne bilikti kadrlardyń ketýi baıqalady. Qarjylandyrýdy aýdandyq deńgeıge kóshirý basqarýdy ońtaılandyrýǵa, sheshim qabyldaýdyń jedeldigin arttyrýǵa jáne mektepterdiń materıaldyq-tehnıkalyq, qarjylyq-sharýashylyq qajettilikterine den qoıýdy jaqsartýǵa múmkindik beredi. Bul óz kezeginde oblystyq bilim basqarmalaryna túsetin júktemeni azaıtyp, bilim berý júıesin tutastaı alǵanda neǵurlym sapaly ári tıimdi basqarýdy qamtamasyz etedi, — dep jazady Serik Jumanǵarın.

Qysqartyp aıtsaq, Úkimet ár aýdan bilim berý mektep pen balabaqsha qyzmetin uıymdastyrýǵa qajetti bıýdjetti óz betimen sheshý kerek degen ustanymdy qoldap otyr.

— Aýdan ákimderin naqty ókilettiktermen jáne qarjylyq derbestikpen qamtamasyz etýdiń mańyzdylyǵyn eskere otyryp, mektepke deıingi tárbıe men oqytýǵa, bastaýysh, negizgi orta jáne jalpy orta bilim berýge arnalǵan bıýdjettik shyǵystardy oblystyq deńgeıden aýdandyq bıýdjet deńgeıine berý týraly usynys qoldaý tabady. Qazir bilim berýdi basqarý fýnktsııalaryn, onyń ishinde bıýdjetti basqarý ókilettikterin aýdandyq deńgeıge qaıtarýdy kózdeıtin normalar Úkimettiń qorytyndysyn daıyndaý aıasynda qaralyp jatyr, — dedi vıtse-premer.

Eske salsaq, Prezıdent Qasym-Jomart Toqaev Ulttyq quryltaıdyń V otyrysynda bilim berý salasyn memlekettik qarjylandyrýdyń qoldanystaǵy tártibi burmalanǵanyn aıtqan bolatyn.