Bilim berý baǵdarlamalaryna JI elementterin engizýge daıyndyq qalaı – Súleımenova jaýaby
ASTANA. KAZINFORM – Búgin Úkimet otyrysynda Premer-mınıstr Oljas Bektenov Oqý-aǵartý mınıstri Juldyz Súleımenovadan bilim berý baǵdarlamalaryna jasandy ıntellekt elementterin engizýge daıyndyq qalaı ekenin surady.
- Bilim berý baǵdarlamalaryna jasandy ıntellekt elementterin engizemiz dep aıttyńyz. Al oǵan daıyndyq bar ma? Infraqurylym, tehnıkalyq baza, ádistemelik qamtamasyz etý qalaı bolyp jatyr?, - dep surady Úkimet basshysy mınıstrden.
Saýalǵa jaýap bergen mınıstrdiń aıtýynsha, Premer-mınıstrdiń tapsyrmasymen jasandy ıntellektini engizýge baılanysty aýyldyq jerlerdegi mektepterdiń ınfraqurylymyn damytý úshin keshendi jumys istelindi.
- Búgingi tańda 7 979 mekteptiń ınternet jelisi tekserildi. Onyń ishinde 1 600 mektepke Starlınk arqyly ınternet jetkizilý máselesi sheshimin tapqandyǵyn atap ótkimiz keledi. Bul - aýyldyq mektepterde. Budan bólek, ádistemelik nusqaýlyqtar daıyndaldy. Jasandy ıntellekt zańyna sáıkes tsıfrlyq saýattylyq páni, sonymen birge ınformatıka pánderi «Tsıfrlyq saýattylyq» jáne jasandy ıntellekt», «Informatıka jáne jasandy ıntellekt» bolyp engizildi. 43 saǵatqa deıin jasandy ıntellekttini oqytý, oqý protsesine tıimdi qoldaný, sonymen birge Ádep kodeksinde tıimdi paıdalaný sekildi taqyryptar men maqsattar qamtyldy. Jalpy, aýyl mektepterine 19-dan astam ádistemelik usynym ázirlendi. 240 myńǵa jýyq ustazdarymyz jasandy ıntellekt assıstentterin oqý protsesine engizýge arnalǵan biliktilikti arttyrý kýrstarynan ótti, - dedi Juldyz Súleımenova.
Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.
