Bilim basqarmasy qyzylordalyq túlekterdi bosqa shyǵyndalmaýǵa shaqyrdy
QYZYLORDA. KAZINFORM — 25 mamyr kúni Qyzylorda oblysyndaǵy mektepterdiń barlyq synybynda «Bilimim Otanyma» atty biryńǵaı synyp saǵattary ótedi.
Oblystyq bilim basqarmasynyń málimetinshe, 11-synyptarǵa arnalǵan saltanatty is-shara bir mezetke, ıaǵnı osy kúngi tańǵy saǵat 9.00-ge belgilengen. 18 maýsymda túlekter attestatyn alady. 9 synyptaǵy 16 386 bilim alýshy qorytyndy bitirý emtıhanyn 29 mamyr men 11 maýsym, 11 synyptaǵy 10 317 bitirýshi memlekettik emtıhandy 2-15 maýsym aralyǵynda tapsyrady.
— Arnaıy buıryqqa sáıkes barlyq bilim berý uıymynyń basshylaryna, ata-analarǵa sándi kıim-keshekke shyǵyndalýdyń orynsyz ekenin túsindirdik. Merekelik dastarhan uıymdastyrýǵa, qalada, qala syrtynda jaldamaly kólikpen ekskýrsııa ótkizýge, emtıhan kezinde dastarhan jaıýǵa, synyp jetekshilerine syılyq uıymdastyrý syndy áreketterge jol bermeý qatań túrde tapsyryldy. Jalpy oqý jylyn aıaqtaý sharalary basqarmanyń qatań baqylaýynda, — dedi basqarma basshysynyń orynbasary Ashat Qanatov.
Merekelik is-sharalar kezindegi qoǵamdyq tártip pen jol qaýipsizdigin oblystyq polıtsııa departamenti qamtamasyz etedi. Osy kúnderi 500-ge jýyq qyzmetker men 100-den astam qyzmettik avtokólik jumyldyrý josparlanǵan. Onyń ishinde Qyzylorda qalasynda 200-den astam qyzmetker jáne 45 qyzmettik avtokólik qyzmet atqarady.
— Mektep bitirý keshi — ár túlektiń ómirindegi mańyzdy ári este qalarlyq kezeń. Alaıda, merekelik kóńil-kúı keıbir jaǵdaılarda jaýapsyz áreketterge ulasyp, túrli keleńsiz oqıǵalarǵa sebep bolyp jatady. Ásirese, kortej uıymdastyrý, jol qozǵalysy erejelerin buzý, kóliktiń terezesinen shyǵý, túngi ýaqytta qoǵamdyq tynyshtyqty buzý sekildi áreketter azamattardyń qaýipsizdigine tikeleı qaýip tóndiredi. Osyǵan baılanysty bilim berý uıymdary aýmaǵynda jáne qoǵamdyq oryndarda kúsheıtilgen profılaktıkalyq jumys júrgizemiz, — dedi departamenttiń basqarma basshysynyń orynbasary Raýan Áldeshov.
Aıta keteıik, bıyl mektep bitirý keshin meıramhana men tabıǵatta ótkizýge tyıym salyndy.
