Bilim basqarmasy kásipkerlerdi 90 mln teńge shyǵynǵa ushyratty

Pavlodar oblysynyń bilim berý basqarmasy bıýdjettik ótinimderi qurý barysynda mekteptegi tamaqtaný qunynyń esebine qosymsha qun salyǵy stavkasyn (12%) engizbegen. Saldarynan kásipkerlerge ár oqýshy úshin 450 teńgeniń ornyna 402 teńgeden tólenip kelgen, dep habarlaıdy Kazinform.

Óńirlik prokýratýra jaqynda jergilikti mektepterde tamaqtandyrýdy uıymdastyrý jónindegi sharttardyń oryndalýyna taldaý júrgize kelip, kásipkerlerdi shyǵynǵa ushyratqan jaǵdaıdy tirkedi. Bilim berý basqarmasy bıýdjettik ótinimderdi usyný kezinde qosymsha qun salyǵyn nazarǵa almaǵan. Sóıtip tamaqtaný somalaryn esepteý kezinde Kásipkerlik kodeksiniń, tamaqtanýdy uıymdastyrý erejeleriniń, salyq jáne bıýdjet zańnamasynyń talaptaryn óreskel buzǵan.

«Bilim berý basqarmasy tamaqtanýdy uıymdastyrǵany úshin tólemdi salyqty shegere otyryp júrgizgen, ıaǵnı, bir oqýshyǵa 450 teńgeniń ornyna 402 teńge tólegen. Atalǵan mán-jaılar qoǵamdyq tamaqtandyrý salasyndaǵy qyzmetti júzege asyratyn 33 sharýashylyq sýbektiniń quqyqtarynyń buzylýyna ákep soqtyrdy», - dep habarlandy oblystyq prokýratýradan.

Prokýrorlardyń pármenimen qadaǵalaý aktisi boıynsha bıýdjettik ótinimderdi qalyptastyrý praktıkasy qaıta qaralyp, jalpy somasy 90 mln teńge kóleminde negizsiz ustalǵan qosymsha qun salyǵy kásipkerlerge qaıtaryp berildi. 

Jiberilgen kemshilikter úshin oblystyń bilim berý basqarmasy basshysynyń orynbasary tártiptik jaýapkershilikke tartyldy.