Bilim basqarmasy Arqalyqtaǵy mektep órtiniń yqtımal sebebin aıtty
ASTANA. KAZINFORM – Vedomstvo ókilderiniń málimetinshe, ǵımaratqa kúrdeli jóndeý jumystyn júrgizgen merdiger uıym shatyrdy qalpyna keltirý jáne órt saldaryn joıýmen aınalysady.
26 mamyr kúni keshke Qostanaı oblysynyń Arqalyq qalasyndaǵy №5 orta mekteptiń shatyrynan órt shyqqan bolatyn. Jalyn sharpyǵan aýmaq 1100 sharshy metrden asty.
Óńirlik kommýnıkatsııalar qyzmetinde ótken brıfıngte oblystyq bilim basqarmasy basshysynyń orynbasary Danagúl Súıindikova aldyn ala málimet boıynsha, órtke dánekerleý jumysty men qaýipsizdik talaptarynyń saqtalmaýy sebep bolýy múmkin. Alaıda tótenshe jaǵdaıdyń naqty sebebi jónindegi qorytyndyny keıinirek tótenshe jaǵdaılar departamentiniń mamandary jarııalaıdy.
Qazirgi tańda pedagogter úshin basty másele – 9 jáne 11-synyp túlekteriniń qorytyndy emtıhandaryn uıymdastyrý. Osy maqsatta tıptik mektep ınfraqurylymy bar oqý-óndiristik kombınattyń kórshiles ǵımaraty daıyndalǵan.
Bilim bólimi oqýshylardyń emtıhandy kedergisiz tapsyryp, oqý jylyn tolyq aıaqtaýy úshin barlyq qajetti jaǵdaı jasalǵanyn málimdedi. Qalǵan sheshim quzyrly organdardyń resmı qorytyndysy shyqqannan keıin qabyldanbaq.
Eske salaıyq, Qostanaı oblysynyń Arqalyq qalasyndaǵy №5 jalpy bilim beretin mekteptiń tórt qabatty ǵımaratynyń shatyrynan órt shyqqan bolatyn. Órt saǵat 23:40-ta tolyq sóndirildi.
