Biliktiligi joq jumyskerler azamattyq qyzmetshiler quramyna qosyla ma – vıtse-premer jaýaby

ASTANA. KAZINFORM — Búginde elimizde biliktiligi joq jumyskerler sany 288 myń adamdy quraıdy. Bul týraly Májilis depýtattarynyń saýalyna Premer-mınıstrdiń orynbasary Ermek Kósherbaevtyń jaýabynda aıtylǵan.

— Eńbek kodeksine sáıkes, memlekettik bıýdjet esebinen azamattyq qyzmetshilerge saýyqtyrýǵa arnalǵan járdemaqy (laýazymdyq aılyqaqy mólsherinde) tólenedi jáne jyl saıynǵy aqy tólenetin negizgi eńbek demalysy (uzaqtyǵy kúntizbelik 30 kúnnen kem bolmaıtyn) beriledi. Azamattyq qyzmetshilerge Jumystar men jumysshy kásipteriniń biryńǵaı tarıftik-biliktilik anyqtamalyǵyna sáıkes, qyzmeti kásiptik daıarlyq pen arnaıy bilimdi talap etpeıtin biliktiligi joq jumyskerler jatpaıdy, — dedi vıtse-premer. 

Úkimet basshysynyń orynbasarynyń atap ótýinshe, olardyń biliktiligin arnaıy komıssııa (tarıftik-biliktilik sıpattamalary negizinde) anyqtaıdy. Bul rette eńbekaqy tóleý júıesinde kózdelgen barlyq qosymsha tólemder men ústemeaqylar (saýyqtyrý járdemaqylardy qospaǵanda) biliktiligi joq jumyskerlerge de qoldanylady.

— Búginde biliktiligi joq jumyskerler sany 288 myń adamdy quraıdy. Olardy azamattyq qyzmetshiler quramyna qosý jáne olarǵa saýyqtyrýǵa járdemaqy berý respýblıkalyq bıýdjetten qosymsha qarajatty (2025 jylǵa 28,7 mlrd. teńge) talap etedi. Osyǵan baılanysty, bul másele memlekettik bıýdjettiń múmkindikterin qaraı qaralatyn bolady, — dedi Ermek Kósherbaev.

Buǵan deıin 10 óńir ákimdigi azamattyq qyzmetshilerdiń jalaqysyn arttyrý quqyǵyn paıdalanbaı otyrǵanyn jazǵan edik.