Biliktiligi tómen be? - Erlan Ábil nege saılanǵan ákimderdiń oqytylatynyn aıtty

ASTANA. KAZINFORM – QR Prezıdentiniń janyndaǵy Memlekettik basqarý akademııasynyń rektory Erlan Ábil «Ákimder mektebi» jobasy qandaı qajettilikten týyndaǵanyn aıtty.

Memlekettik qyzmet isteri agenttiginde ótken baǵdarlamanyń ashylýyna arnalǵan jıynda BAQ ókili spıkerden «Saılanǵan ákimderdiń biliktiligi tómen be? Bul baǵdarlamany ótkizý nege qajet boldy?» dep surady. 

— Zań boıynsha elimizde saılaýǵa 25-ten asqan, arnaıy nemese joǵary bilimi bar azamat túse alady. Al el basqarý, jergilikti jerdi basqarý arnaıy biliktilikti talap etedi. Saılanǵan ákimderge halyq sendi, endi bizdiń maqsatymyz halyq sengen ákimderge qajetti quzyrettilikterdi, qajetti bilimderdi berý, - dep jaýap berdi rektor. 

Onyń aıtýynsha, kýrstan ótetin ákimder 17 aqpan men 13 mamyr aralyǵynda oblys ortalyqtaryndaǵy Memlekettik basqarý akademııasynyń fılıalyna kelip, dáris tyńdap, keısterin sheship ketip otyrady. Sodan soń óz jumysyna oralyp, qashyqtan oqı beredi. 
Úsh megapolıs – Astana, Almaty, Shymkent qalalarynda oqytý júrgizilmeıdi. Sebebi elimizde tek aýdandyq mańyzy bar qalalar, aýyldar, kentter, aýyldyq okrýgterdiń ǵana ákimderi saılanǵan bolatyn.

Atap aıtqanda, elimizde 2021 jylǵy shildeden 2024 jylǵy jeltoqsanǵa deıingi kezeńde aýyldyq okrýgterdiń 95%-da, ıaǵnı 2176 aýyldyq okrýgte 2 566 ákim saılandy. QR Premer-mınıstriniń orynbasary Qanat Bozymbaev olardyń 60%-y buryn ákim bolyp nemese memlekettik qyzmette jumys istemegenin aıtty.

Sondaı-aq saılanǵan aýyl jáne aýdan basshylary qalaı oqytylatynyn túsindirdi.

Búgin elimizde saılanǵan aýyl jáne aýdan basshylaryn oqytý bastaldy.