BlackRock Panama kanalyndaǵy porttardy satyp almaq

ASTANA. KAZINFORM – BlackRock halyqaralyq ınvestıtsııalyq kompanııasy qor naryǵynyń quldyraýyn, AQSh ekonomıkasynyń yqtımal quldyraýyn jáne Panama kanalyndaǵy porttardy baqylaýǵa alýdy kútip jatyr.

BlackRock bas dırektory Larrı Fınk dúısenbide Nıý-Iork ekonomıkalyq klýbynda birneshe málimdeme jasady, dep habarlaıdy Fox Business.

- Men sóılesken bas dırektorlardyń kópshiligi biz qazir retsessııada bolýymyz múmkin deıdi, - dedi Larrı Fınk.

Fınktiń pikirinshe, «ekonomıka dál qazir álsirep jatyr» jáne aldaǵy aılarda onyń baıaýlaýy jalǵasady, al ınflıatsııa kóterilýi múmkin.

Tarıfter ónimderdiń keń aýqymyn qymbattatyp, sońǵy aılarda saqtalyp qalǵan ınflıatsııalyq qysymdy qosady dep kútilip otyr.

Fınk sheteldik úkimetterdiń tarıfteri men jaýap sharalary kúshine enýimen ınflıatsııa boljamyna baılanysty Federaldy rezervtik júıe bıylǵy paıyzdyq mólsherlemelerdi tómendetetinin kórmeı otyr.

Prezıdent Donald Tramptyń tarıfterine qatysty belgisizdik jaǵdaıynda qor naryǵy taǵy 20%-ǵa tómendeıdi. Fınk aktsııanyń quldyraýy kúsheıe túsetinin de aıtty, biraq uzaq merzimdi perspektıvada bul satyp alý múmkindigin týdyrady.

- Men uzaq merzimdi perspektıvada bul satýdan góri satyp alý múmkindigi der edim, - dep atap ótti Larrı Fınk.

Tramptyń 2 sáýirde baj salyǵyn engizý týraly málimdemesi kelesi kúnderi naryqty quldyratyp jiberdi: Dow Jones Industrial Average, S&P 500 jáne Nasdaq Composite sońǵy bes saýda kúninde 9%-dan astam jáne ótken aıda 10%-dan astam tómendedi.

Aktsııanyń quldyraýyna qaramastan, Fınk BlackRock kompanııasynyń Gonkongtaǵy CK Hutchison Holdings kompanııasynan Panama kanalyndaǵy «Balboa» jáne «Krıstobal» porttaryn, sondaı-aq 23 eldegi 43 portty satyp alý týraly usynysty qarastyryp jatqanyn atap ótti.

Mámile 22,8 mlrd dollarǵa baǵalanǵan.

Buǵan deıin amerıkalyqtar Panama kanaly aınalasyndaǵy negizgi porttardy baqylaýǵa alatynyn jazǵan bolatynbyz.