Blackout: Almatynyń barlyq qyzmetteri kúsheıtilgen rejımge kóshti
ALMATY. KAZINFORM – Almaty ákimdigi qalalyq qyzmetterdiń jumysy men elektrmen jabdyqtaýǵa qatysty ahýal týraly túsinikteme berdi.
Qala ákimdiginiń málimetinshe, 14 tamyzda elektr jelilerinde bolǵan apatqa baılanysty qalada syrtqy elektrmen jabdyqtaý ýaqytsha óshirildi. Qazir qalanyń basym bóliginde jaryq qaıta qosyldy.
— Qazirgi ýaqytta barlyq qalalyq qyzmetter kúsheıtilgen rejımde jumys istep jatyr jáne qalanyń tynys-tirshiligin qamtamasyz etý úshin qajetti sharalar qabyldandy, — dep habarlady ákimdikten.
Sondaı-aq elektr energııasynyń óshýine baılanysty metropolıten jumysy ýaqytsha toqtaǵan. Metro beketterinde elektrmen jabdyqtaý qalpyna keltirilip, relsterge kerneý berilgenge deıin kirip-shyǵý ýaqytsha jabyldy. Metropolıten jumysynyń qaıta jandanýy týraly qosymsha habarlanady.
Qala ákimdigi statsıonarlar men medıtsınalyq uıymdar úzdiksiz qyzmet etý josparyna sáıkes jumysyn jalǵastyryp jatqanyn atap ótti. Medıtsınalyq mekemeler rezervtik elektr kózderimen — dızeldi generatorlarmen qamtamasyz etilgen.
— Birinshi kezekte rezervtik qýat kózi reanımatsııalarǵa, operatsııalyq bólmelerge, qabyldaý bólimshelerine, ómirdi qamtamasyz etý júıelerine jáne basqa da asa mańyzdy jabdyqtarǵa berildi. Shuǵyl medıtsınalyq kómek bekitilgen tártippen kórsetilip jatyr, — delingen ákimdik málimdemesinde.
Odan bólek jaryq bolmaǵan ýaqytta «Shymbulaq» pen «Kóktóbedegi» aspaly arqan joldardyń jumysy toqtaǵan.
Almaty halyqaralyq áýejaıy jaryqtyń sónýine qaramastan, rezervtik generatorlardyń arqasynda shtattyq rejımde jumys istegenin habarlady. Áýejaıdyń úzdiksiz operatsııalyq qyzmeti qamtamasyz etilgen.
Eske salaıyq, búgin saǵat 14:38 shamasynda Almaty men Almaty oblysynyń basym bóliginde jaryq óshti.
Almatyda jaryq óshýine baılanysty 9 baldyq keptelis paıda boldy.
Sondaı-aq qalada jaryq óshkennen keıin sý berý toqtady.
