BQO jýrnalısteri koronavırýs ekpesin saldyrdy
ORAL. QazAqparat – Batys Qazaqstan oblysynyń jýrnalısteri koronavırýsqa qarsy ekpe saldyrdy, dep habarlaıdy QazAqparat tilshisi.
Qalalyq №1 emhanada ekpe alǵandardyń arasynda respýblıkalyq jáne óńirlik gazetterdiń, sondaı-aq telearnalardyń tilshileri men qyzmetkerleri bar.
«Jaıyq Pres» JShS-ǵa qarasty oblystyq «Prıýrale» gazetiniń bas redaktory Roza Syıyqovanyń aıtýynsha, ekpe alǵannan keıingi jaǵdaıy qalypty.
«Qazirgi tańda indet órship tur. Sondyqtan únemi aldyńǵy shepte júretin jýrnalısterge ekpe alý qajet dep oılaımyn. BAQ qyzmetkerleriniń aldyńǵy legi qatarynda tek bizdiń redaktsııadan tórt adam vaktsına saldyrdy. Aldaǵy ýaqytta ekpe alamyn dep tilek bildirip otyrǵandar barshylyq», - dedi QazAqparat tilshisine R.Syıyqova.
BQO densaýlyq saqtaý basqarmasynan túsken málimetke qaraǵanda, 1 aqpannan beri óńirde 21 745 adam vaktsınanyń birinshi komponentin saldyrsa, sonyń 5 208-i – medıtsına qyzmetkerleri, 3 934-i – pedagog, 1 695-i – quqyq qorǵaý organdarynyń, 10 908-i – basqa sala ókilderi.
Sonymen qatar búginge deıin 4 117 adam vaktsınanyń ekinshi komponentin saldyrdy.
Eske sala keteıik, budan buryn Batys Qazaqstanda sońǵy tórt kúnde 463 adamnan koronavırýs anyqtalǵanyn, ınfektsııalyq statsıonarda jatqandar sany 580-ge jetkenin jazǵan bolatynbyz.
