BQO joldaryn jóndeýge 36,5 mlrd teńge bólinip otyr
ORAL. QazAqparat - Batys Qazaqstan oblysynda joldardy jóndeýge 36,5 mlrd teńge bólinip otyr. Bul týraly oblystyq máslıhattyń kezekti sessııasynda málim etildi, dep habarlaıdy «QazAqparat» tilshisi.
Oblys ákimi Altaı Kólginovtiń atap ótkenindeı, jýyrda óńirdiń barlyq aýdandaryn aralaǵan kezde turǵyndardyń kótergen basty máselesi osy jol boldy. Sondyqtan jol salý men jóndeýge birinshi kezekte nazar aýdarylýda. Bıyl 480 km jol retke keltirilmekshi. Oral qalasynyń ózinde 67 kósheniń jolyn jóndeýge 8,3 mlrd. teńge jumsalmaq. Negizgi kósheler ǵana emes, qalanyń shetkeri aýdandaryna da kezek keldi. Tek oblys ortalyǵynda jylyna keminde 50 km jol jóndeý qajettigi týyndap otyr. Eger jylyna 80-100 km jol jóndelse, bul másele tórt-bes jylda sheshiledi deýge bolady. Qazirgi kezde aldaǵy jyldarǵa jobalyq-smetalyq qujattama jasalýda. Sonymen qatar oblys, aýdan ortalyqtary ǵana emes, aýyldarǵa da jol salynatyn bolady.
Búgingi sessııada maqsatty transfertter esebinen qosymsha bólingen qarjynyń 1,5 mlrd teńgeden astamy osy jol jóndeýge baǵyttalmaq.
BQO ekonomıka jáne bıýdjettik josparlaý basqarmasynyń basshysy Qaısar Mańqaraevtyń aıtýynsha, óńir bıýdjeti 18,3 mlrd teńgege naqtylanyp otyr. Mysaly, densaýlyq saqtaýǵa 233 mln teńge bólinse, sonyń ishinde Bórli aýdanynda eki nysan qurylysyna qarjy qaralmaq. Bilim salasyna berilgen 1,6 mlrd teńge esebinen Qaztalov aýdany men Oral qalasynda eki nysandy kúrdeli jóndeý, Terekti aýdany Saryómir aýylynda 48 oryndyq saýyqtyrý lageriniń qurylysyn bastaý (30 mln teńge), Jánibek aýdany Aqoba aýylyndaǵy orta mekteptiń sport zalyna qosymsha qurylysty salý (63,1 mln teńge) kózdelýde. Sondaı-aq Oralda salynyp jatqan 300 oryndyq №4 orta mektep qurylysyna qosymsha 95,1 mln teńge qaraldy. Mádenıet, sport, týrızm jáne aqparattyq keńistik salasyna 1,1 mlrd teńge qarastyrylsa, sonyń ishinde Aqjaıyq aýdanynda mádenıet nysanyn kúrdeli jóndeýdi aıaqtaý men Oralda daryndy balalarǵa arnalǵan sport-ınternaty kesheni qurylysyn bastaýǵa 120 mln teńge, Terekti jáne Zelenov aýdandarynda qos birdeı mádenıet jáne sport nysany qurylystaryn jalǵastyrýǵa 249,9 mln teńge berildi. Basqa da salalarǵa tıisinshe qarjy bólindi.
