BQO jańajyldyq bezendirýge qansha qarajat jumsaıdy

ASTANA. KAZINFORM – Batys Qazaqstan oblysynyń ákimi Narıman Tóreǵalıev bıylǵy jańajyldyq bezendirýge qansha qarajat bólingenin aıtyp berdi.

– Men 2023 jyldan bastap, shyrsha satyp alýdy toqtatyp qoıdym. Kezinde maǵan deıin satyp alynǵan shyrshany áli paıdalanyp kele jatyrmyz. Jyl saıyn sony paıdalanamyz jáne qaıtadan jınap alamyz. Kelesi jyly taǵy da sony shyǵaramyz, – dedi N.Tóreǵalıev elordada Ortalyq kommýnıkatsııalar qyzmetinde.

Ákimniń aıtýynsha, bıylǵy jylǵa qala ákimdigi 11 mıllıon teńge kóleminde qarajat josparlap otyr.

– Bul aqsha shyrshaǵa jumsalmaıdy. Qalany bezendirý bar, balalardyń is-sharalary bar, solarǵa jumsalatyn jalpy qarajat – 11-aq mıllıon teńge, – dep tolyqtyrdy oblys ákimi.

Buǵan deıin BQO ákimi óńirdegi tuz tapshylyǵy týraly pikir bildirgen edi.

Sondaı-aq kelesi jyly Bókeı ordasynyń qurylǵanyna 225 jyl tolady. Mereıtoıǵa daıyndyq jumystary byltyr bastalyp ketti.