BQO: Jańaqala aýdanynda kadastrlyq quny 33 mln. astam teńge turatyn 8938 ga jer paıdalanylmaǵan
Aýdan prokýrory Arman Qabanovtyń aıtýynsha, qazirgi kezde atalǵan jer telimin arnaıy jer qoryna qaıtarý jumystary júrgizilýde.
Sonymen qatar aýdan prokýratýrasy «Óńirlerdi damytý» baǵdarlamasy boıynsha bólingen bıýdjettik qarjynyń jumsalýyn tekserdi. Atalǵan baǵdarlamaǵa sáıkes Jańaqala aýdany ortalyǵy Jańaqala aýylynyń keıbir kóshelerindegi úılerdiń abattandyrý jumystary boıynsha aýyldyq okrýg apparaty men «SaıanStroıServıs» JK arasynda ekijaqty kelisim-shart jasalǵan. Tekserý barysynda merdigermen jumystyń tolyq kólemde atqarylmaǵanyna qaramastan, qarjy túgeldeı tólengen. Jańaqala aýyldyq okrýginiń ákimi E.Tanzenovke qatysty laýazymyn asyra paıdalaný deregi boıynsha qylmystyq is qozǵalyp, tergeý amaldary júrgizilýde.
Kásipkerlerdiń quqyqtaryn qorǵaý salasynda «Qamys-Samar» qoǵamdyq qorynyń zańsyz qyzmeti jarııa boldy. 2015-2016 jyldary aýdan ákimdiginiń laýazymdy qyzmetkerleri túrli mádenı is-sharalardy ótkizý úshin qordyń esepshotynan qarjy alyp, jumsaǵan. Qordyń esepshotyna kásipkerlerdiń demeýshilik kómegimen qatar aýdandaǵy bıýdjettik mekemeler qyzmetkerleri bir kúndik jalaqylaryn aýdarǵan. Alaıda 2015 jyly túsken qarajattyń basym bóligi qoǵamdyq qordyń jarǵysyna saı kelmeıtin is-sharalarǵa ketken. Aýdan prokýratýrasynyń usynysy negizinde QR Memlekettik qyzmet isteri mınıstrligi BQO-daǵy ádep jónindegi keńesiniń usynymy boıynsha memlekettik qyzmetke kir keltiretin teris qylyqtar jasaǵany úshin aýdan ákiminiń orynbasary D.Zakarın, aýdandyq kásipkerlik bóliminiń basshysy E.Meńdihan, aýdandyq mádenıet, tilderdi damytý, dene shynyqtyrý jáne sport bóliminiń basshysy B.Qaraǵoıshın aýdan ákiminiń ókimimen qyzmetine tolyq sáıkes emestigi týraly eskertý túrindegi tártiptik jaýapkershilikke tartyldy.
Bıylǵy segiz aıda sol sekildi alaıaqtyq boıynsha 4 qylmys tirkeldi. Sonyń ishinde «Jańaqala et» kásipornynyń dırektory S.Tileýǵalıevtiń zańsyz sýbsıdııa alý jolymen 24,3 mln. bıýdjet qarjysyn jymqyrǵany áshkerelendi. Tergeý barysynda S.Tileýǵalıev kinásin tolyq moıyndap, keltirilgen zalaldy memleket paıdasyna tolyqtaı óndirdi. Aýdandyq sottyń úkimimen ol shartty túrde 5 jyl merzimge bas bostandyǵynan aıyrý jazasyna kesildi.