BQO: «Zenıt» zaýytynyń jumysshylary óndiristiń órkendeýin Elbasymen baılanystyrady - FOTO
ORAL. QazAqparat - 13 naýryz kúni «Oral «Zenıt» zaýyty» AQ-da jumysshylar «Nur Otan» partııasy XVI seziniń QR Prezıdenttigine Nursultan Nazarbaevtyń saılaýǵa qatysý týraly sheshimin qyzý qoldaıtyndyqtaryn bildirdi.
Jıynda zaýyt dırektory Vıacheslav Valıevtiń málim etkenindeı, atalmysh eńbek ujymy Elbasy saıasatyn únemi qoldap keledi. Óıtkeni táýelsizdiktiń qaz basqan alǵashqy jyldary burynǵy ekonomıkalyq baılanystar úzilip, zaýyt qıyn jaǵdaıǵa tap bolǵan kezde birinshi qoldaý kórsetken Prezıdent edi. Sodan beri Elbasynyń tapsyrmasyna sáıkes Qazaqstannyń qorǵanys salasy úshin qazirgi zamanǵy ónimder shyǵarý júıeli jolǵa qoıyldy. Ásirese, Kaspıı teńizinde el shekarasyn qorǵaıtyn kemelerdi «Zenıt» zaýyty qurastyratynyn búkil el biledi. Kúni búginge deıin 22 tez júretin katerler men kemeler shyǵarylyp, olar óz qyzmetin atqarýda. Aldaǵy ýaqytta keme jasaý baǵdarlamasyna qatysa otyryp, óndiris jetildirile túsetin bolady. Zaýyt sý yǵystyrylymy 600 tonnaǵa deıingi kemelerdi jasaýǵa daıyn. Bul, ekinshi jaǵynan, jumys oryndaryn saqtap, jalaqyny ýaqtyly tóleýge múmkindik beredi.
Budan buryn zaýyt jumysshylary Qazaqstan halqy Assambleıasy keńesiniń Qazaqstan Respýblıkasy Prezıdenti saılaýyn ótkizý jónindegi úndeýin qoldap, Elbasynyń atyna aldaǵy Prezıdent saılaýyna óz kandıdatýrasyn usyný jóninde hat joldaǵan bolatyn. Sezde el azamattary men eńbek ujymdarynan osyndaı hattardyń kóptep túskenin jetkizgen Elbasy aldaǵy saılaýǵa túsýge kelisim bergenin aıtty. Muny «Zenıt» zaýytynyń jumysshylary da úlken qýanyshpen qabyldap, aldaǵy ýaqytta da Qazaq eliniń órkendeýi Nursultan Nazarbaevtyń basqarýyna baılanysty ekenin atap ótti. Sondaı-aq, «Nur Otan» partııasy oblystyq fılıaly tóraǵasynyń birinshi orynbasary Serik Súleımen prezıdenttik saılaýdy ótkizýge qatysty qoǵamdyq shtab qurylǵanyn málimdedi. Shtabtyń jumysyna tek «Nur Otan» partııasynyń ǵana emes, oǵan tilektes qoǵamdyq uıymdar men birlestikterdiń, ózge de saıası partııalardyń ókilderi qatyspaq. Shtab jumysyna eshqandaı partııada joq jáne ózderi yqylas bildirgen eriktilerdiń de belsendi qatysýyna múmkindik bar. Osyndaı shtabtar «Nur Otan» partııasynyń aýdandyq bólimshelerinde de ashylyp, jumys isteıtin bolady.
