BQO turǵynynan sırek kezdesetin juqpaly aýrý tirkeldi
BQO sanıtarııalyq-epıdemıologııalyq baqylaý departamentiniń baspasóz qyzmetinen málim etkendeı, dırofılıarıoz Oral qalasynyń turǵynynan anyqtaldy.
Dırofılıarıoz – buryn tek zoospetsıfıkalyq dep sanalǵan gelmıntozdardyń biri jáne sońǵy ýaqytqa deıin bul aýrýdy tek janýarlar, ásirese, ıtter juqtyryp kelgen. Biraq sońǵy jyldary ony adamdardyń juqtyrý jaǵdaılary jıi tirkele bastady.
Departamentten túsken málimetke qaraǵanda, adamdarda ınfektsııa qan arqyly júredi. Aýrý kóbinese masalardyń, sondaı-aq búrge, qan soratyn jándikterdiń basqa túrleriniń shaǵýy arqyly beriledi. Juqtyrý kózi – úı janýarlary. Eń aldymen ıtter, keıde mysyqtar. Eresek dırofılıarııalar janýarlardyń júrek, ókpe, qolqa jáne iri qan tamyrlarynda parazıttik tirshilik etedi. Urǵashylary mıkroskopııalyq mólsherdegi myńdaǵan lıchınka-mıkrofılıarııalardy qanǵa bóledi. Olardyń kishkentaı bolǵany sonshalyq, qan aǵymy men lımfa aǵymy arqyly búkil denege taralady.
Janýardyń qanymen mıkrofılıarııa masaǵa túsedi, ıaǵnı jándik ınvazııalanǵan janýardy shaqqan kezde, dernásilder onyń ish qýysyna enedi, biraq olardyń bir bóligi masanyń tumsyǵynda qalyp qoıady. Jándik oljasyn shaqqanda, tumsyǵyndaǵy parazıtterdiń bir bóligi onyń qanyna túsedi. Osylaısha dırofılıarıoz janýardan janýarǵa jáne adamǵa beriledi.
Inkýbatsııalyq kezeń 1 aıdan birneshe jylǵa deıin sozylady, ol ımmýndyq júıege jáne parazıttiń damý jyldamdyǵyna baılanysty.
«Dırofılıarıozdy barlyq jastaǵy adamdar juqtyrýy múmkin. Degenmen ıt pen mysyq ustaıtyn, ashyq sý qoımalary janynda turatyn, tabıǵat aıasyna jıi shyǵatyn adamdarda juqtyrý qaýpi joǵary.
Dırofılıarıoz qozdyrǵyshyn juqtyrǵan adamdardyń 10-40 paıyzynda teri astynda túıin paıda bolady. Gelmınt birneshe ondaǵan santımetr qashyqtyqta júre alady, al onyń qozǵalys jyldamdyǵy 1-2 kúnde 30 sm bolýy múmkin. Parazıt júrgen árbir jańa jerde túıin paıda bolady, al buǵan deıin bolǵan jerinde ol iz-túzsiz joǵalady. Eger gelmınt ýaqtyly joıylmasa, onyń ornalasqan jerinde abstsess paıda bolýy yqtımal.
Saqtaný úshin repellentterdi, terezelerge arnalǵan torlardy, qorǵanys kıimderin paıdalaný, úı janýarlaryn profılaktıkalyq degelmıntızatsııalaý qajet. Jándik shaqqannan keıin qatty qyshý, aýyrsyný sezilip, túıin paıda bolsa, dereý dárigerge qaralý kerek», - dep habarlady vedomstvodan.