BQO turǵynynan kıiktiń múıizi úshin 11 mln teńge óndiriledi
ORAL. QazAqparat - Qaztalov aýdandyq sotynyń 11 qazan kúngi úkimimen M. degen turǵyn QR QK 339-babyna sáıkes aıypty dep tanylyp, onyń 1,6 jylǵa bas bostandyǵy shekteldi.
Oǵan qosa BQO orman sharýashylyǵy jáne janýarlar dúnıesi aýmaqtyq ınspektsııasynyń talap-aryzy tolyqtaı qanaǵattandyrylyp, atalǵan azamattan memleket paıdasyna 11 mln-nan astam teńge óndirildi.
Sot talqysynda belgili bolǵanyndaı, M. Jánibek aýdany Jaqsybaı aýylyna qarasty «Bóget qystaǵy» mańynan paketke salynǵan 26 dana kıik múıizin taýyp alyp, ózimen birge Qaztalov aýdany Qoshankól aýylyna alyp kelip, zańsyz saqtaǵan. Sodan keıin ony satyp, paıda tabý maqsatynda Subaru Legacy avtokóligimen Oralǵa shyqqan bette aýdandyq ishki ister bólimi qyzmetkerleriniń qolyna túsken.
Sot úkimi zańdy kúshine engen joq.
Eske sala keteıik, qazirgi kezde osy sotta kıikti zańsyz aýlaǵandardyń isin qaraý jalǵasýda.
