BQO turǵynynan Kalashnıkov avtomaty men tapanshalar tabyldy
BQO polıtsııa departamentiniń baspasóz qyzmetinen málim etkenindeı, qazirgi kezde kúdiktiniń qarýdy ne úshin jınaǵanyn jáne qaıdan alǵanyn anyqtaý maqsatynda tergeý amaldary júrgizilýde.
Qaýipti oljany 6 qyrkúıek kúni BQO polıtsııa departamenti ekstremızmge qarsy kúres basqarmasynyń qyzmetkerleri jedel áreket etý arnaıy jasaǵynyń qoldaýymen «Ýchaske» jedel aldyn alý is-sharasy aıasynda tapty.
«Memleket basshysy óz Joldaýynda uıymdasqan qylmysqa qarsy kúresti kúsheıtý qajettigine basa nazar aýdardy. Prezıdent tapsyrmasyn oryndaý maqsatynda BQO polıtsııa departamenti kúdiktilerdi anyqtaý boıynsha jedel jumystar júrgizýde. Sonyń nátıjesinde «Volna» saıajaı qoǵamynda turatyn 1970 jylǵy «G» degen turǵynnyń mekenjaıyn tekserý barysynda «AK-47» avtomaty, 5 oq-dárisi bar AK-47 qorapshasy, 7/62 kalıbrli AK-47 qorapshasy, oqpany joq 1944 jylǵy «Nagan» revolveri, serııasy joq revolver, 9/19 kalıbrli PM tapanshasynyń qorapshasy, 198 dana 7,62h39mm kalıbrli oq-dári, 20 dana 5,45h79mm kalıbrli oq-dári, 6 dana 9h18mm kalıbrli oq-dári, sondaı-aq kisender tárkilendi. Qarýdyń barlyq túrleri boıynsha ballıstıkalyq saraptama taǵaıyndaldy. Ustalǵan azamatqa qatysty QR QK 287-baby 3-bóligine (qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) sáıkes sotqa deıingi tergeý bastaldy», dep habarlady vedomstvodan.
Eske sala keteıik, budan buryn BQO-da 5 jasar balanyń eski tońazytqyshtyń ishinde kilttenip, tunshyǵyp qalǵanyn jazǵan bolatynbyz.
