BQO turǵynynan 100-den astam kıik múıizi tárkilendi
ORAL. QazAqparat – Batys Qazaqstan oblysynda aýyl turǵynynan 100-den astam kıik múıizi tárkilendi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 12 aqpan kúni Bókeı ordasy aýdany Bórli aýyly mańynda oryn aldy.
Osy aýdannyń 1990 jylǵy turǵynynan 102 dana kıik múıizi tabyldy.
Atalǵan oqıǵa boıynsha QR QK 339-1-babyna (kıikterdi zańsyz qolǵa túsirý, joıý, sol sııaqty zańsyz qolǵa túsirilgen kıikti nemese onyń derıvattaryn, onyń ishinde múıizderin ıemdený, saqtaý, ótkizý, ákelý, áketý, jóneltý, tasymaldaý) sáıkes sotqa deıingi tergeý amaldary júrgizilýde.
Memleketke keltirilgen shyǵyn anyqtalýda.
Aıta keteıik, kúdiktige qatysty Qylmystyq kodekstiń jańa baby qoldanyldy. Bul bap boıynsha onyń múlki tárkilenip, úsh jyldan bes jylǵa deıin bas bostandyǵyn shekteý ne sol merzimge bas bostandyǵynan aıyrý jazasy kesiledi.
Bıyl elimizde jańa jyldan bastap brakonerlikke baılanysty zań talaptary qatańdatylǵan bolatyn.
Oblysta zańsyz kıik aýlaý jáne sonymen aınalysyp júrgen qylmystyq toptardyń jolyn kesý baǵytynda BQO polıtsııa departamentiniń bastyǵy, polıtsııa general-maıory Maqsuthan Ablazımovtyń buıryǵymen tájirıbeli qyzmetkerlerden jedel tergeý toby quryldy. Oǵan departament bastyǵynyń orynbasary, polıtsııa polkovnıgi Asylǵalı Meńdiǵalın jetekshilik etedi.
Eske sala keteıik, budan buryn BQO-da brakonerlerdiń 45 kıikti atyp óltirip, óleksesin dalaǵa tastap ketkenin jazǵan bolatynbyz.
