BQO turǵyny jıhaz jasap beremin dep 17 adamdy aldaǵan
ORAL. QazAqparat –Oral qalasynyń turǵyny jıhaz jasap beremin dep 17 turǵyndy aldap ketken, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, 25 jastaǵy kúdikti ustalyp, ýaqytsha ustaý ızolıatoryna qamaldy.
Qazirgi kezde QR QK 190-baby 3-bóligine (alaıaqtyq) sáıkes sotqa deıingi tergeý amaldary júrgizilýde.
Jábirlenýshilerdiń biri, 24 jastaǵy áıel jıhaz jasatpaq bolyp, Oraldaǵy jıhaz qurastyrýshylardyń birine júgingen. Kúdikti onyń senimine kirý arqyly 260 myńnan astam teńgesin ıemdenip ketken.
«Kúdiktiniń turaqty jumysy joq, osyndaı jolmen paıda taýyp kelgen. Barlyǵy 17 turǵyndy aldap, aqshasyn jymqyrǵan. Onyń basqa da qylmystarǵa qatystylyǵy, sondaı-aq jábirlenýshilerge keltirilgen zalal kólemi anyqtalý ústinde», dep habarlady vedomstvodan.
Eske sala keteıik, budan buryn BQO-da qyzmetker óziniń mektebinen 12 noýtbýk jymqyryp, 1,8 mln teńge zalal keltirgenin jazǵan bolatynbyz.
