BQO turǵyny jer alyp beremin degen alaıaqqa 2 mln teńgesin ustatyp jibergen
ORAL. QazAqparat – BQO turǵyny jer alyp beremin degen alaıaqqa 2 mln astam teńgesin ustatyp jibergen, dep habarlaıdy QazAqparat tilshisi.
BQO polıtsııa departamenti baspasóz qyzmetiniń málim etkenindeı, qazirgi kezde 43 jastaǵy alaıaq áıel ustalyp, QR QK 190-baby 3-bóligine ( iri mólsherde jasalǵan alaıaqtyq) sáıkes sotqa deıingi tergeý amaldary júrgizilýde.
Oral qalasynyń turǵynyna barlyǵy 10 epızod boıynsha aıyp taǵylyp otyr. Ol budan buryn da alaıaqtyq is-áreketteri úshin birneshe ret isti bolǵan.
Bul joly alaıaq áıel turǵyndarǵa jeke úı salý úshin jer telimderin alyp beremin dep aldaǵan. Sonyń ishinde Bórli aýdanynda turatyn áıel 2 mln astam teńgesin berip jibergen.
BQO polıtsııa departamenti turǵyndarǵa deldaldarmen kúmándi baılanysqa túspeı, jer telimderi týraly barlyq málimetti resmı kózderden alýǵa bolatynyn eske salady.
