BQO turǵyny úıiniń aýlasynan snarıad taýyp aldy
ORAL. QazAqparat - 15 tamyz kúni Aqjaıyq aýdany Chapaev aýylynda 1970 jylǵy turǵyn óziniń aýlasynda jer qazyp jatyp, jarylǵysh zat taýyp aldy, dep habarlaıdy «QazAqparat» tilshisi.
BQO ІІD baspasóz qyzmetinen túsken málimetke qaraǵanda, oqıǵa ornyna polıtsııa qyzmetkerleri jetken. Tabylǵan jarylǵysh zattyń Azamat soǵysy kezinen qalǵan snarıad ekendigi anyqtaldy. Onyń uzyndyǵy 32 sm, dıametri 7,5 sm.
Qaýipsizdik sharalary qolǵa alynyp, arnaıy mamandardyń qatysýymen snarıad zalalsyzdandyryldy.
Aıta keteıik, oblys aýmaǵynda Azamat jáne Ekinshi dúnıejúzilik soǵys kezinen qalǵan snarıadtar budan buryn da birneshe ret tabylǵan bolatyn.
