BQO turǵyny mas kúıinde kóligin soǵyp, 30 táýlikke qamaldy
ORAL. QazAqparat - Batys Qazaqstan oblysynda turǵyn mas kúıinde kóligin soqtyryp qana qoımaı, qamalyp tyndy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Qaztalov aýdandyq №2 soty azamat K-ǵa qatysty QR Ákimshilik quqyqbuzýshylyq kodeksi 608-baby 7-bóligine sáıkes qozǵalǵan iske núkte qoıdy.
Sotta anyqtalǵandaı, Jalpaqtal aýylynda turatyn K. budan buryn da QR Ákimshilik quqyqbuzýshylyq kodeksi 608-baby 6-bóligine sáıkes jaýapkershilikke tartylyp, kólik quraldaryn basqarý quqyǵynan aıyrylǵan. Sony bile tura, 16 qazan kúni «VAZ» kóliginiń rýline masań kúıde otyryp, Baıqońyr kóshesinde qarsy bette N. degen azamat aıdap kele jatqan «Ladamen» soqtyǵysýǵa jol bergen. Sonyń saldarynan eki kólik te búlingen. Mundaı jol-kólik oqıǵasyn bir jyl ishinde qaıtalap jasaǵan.
Sotta jaýapqa tartylýshy kinásin moıyndap, ókinetinin aıtty.
Sot K-ny QR Ákimshilik quqyqbuzýshylyq kodeksi 608-baby 7-bóligine sáıkes aıypty dep taýyp, ony 30 táýlikke qamaýǵa qaýly etti.
Sot qaýlysy kúshine engen joq.
