BQO turǵyny quny 4,5 mln astam teńge turatyn kıikti tirideı ustap alǵan
«Ohotzooprom» ÓB» RMQK Batys óńirlik fılıalynan málim etkenindeı, oqıǵa 31 mamyr kúni Aqjaıyq aýdany aýmaǵynda boldy.
Chapaev-Jańaqala tas jolynyń Dóńgelek eldi mekeni burylysynda «Nıva Shevrole» avtokóligin toqtatyp, teksergen kezde artqy júk salǵyshynan bir bas kıik tekesi shyqty.
«Avtokólikte bir adam bolǵan. Ol kıikti elektr baqtashy symyna oralyp qalǵan jerinen taýyp aldym dep túsindirgen. Júksalǵyshta kıikke qosa buzaý da jatqan. Ony ózimdiki degen. Atalǵan derek boıynsha QR QK 339-baby 1-1-bóligine (kıikti zańsyz qolǵa túsirý, joıý, sol sııaqty zańsyz qolǵa túsirilgen kıikti nemese onyń derıvattaryn, onyń ishinde múıizderin ıemdený, saqtaý, ótkizý, ákelý, áketý, jóneltý, tasymaldaý) sáıkes qylmystyq is qozǵaldy», dep habarlady vedomstvodan.
Atalǵan bap boıynsha kináli dep tabylǵan adam múlki tárkilenip, úsh jyldan bes jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
BQO Orman sharýashylyǵy jáne janýarlar dúnıesi aýmaqtyq ınspektsııasynyń bas mamany Raıymbek Shampaevtyń naqtylaýynsha, kıik tekesiniń quny 4 mln 594,5 myń teńgege baǵalanady.
«Bıylǵy áýe sanaǵynyń nátıjesi boıynsha oblystaǵy kıik sany 801 myńdy qurady», dedi R.Shampaev.
Eske sala keteıik, budan buryn Batys Qazaqstanda tórt adamdy jaraqattaǵan qasqyrdyń qutyrǵan bolyp shyqqanyn jazǵan edik.