BQO turǵyny kıiktiń 80 múıizimen ustaldy
ASTANA. QazAqparat - Oral - Atyraý tas jolynda 2 qarasha kúni saǵat 03:00 shamasynda kıiktiń 80 dana múıizin avtokóligimen alyp bara jatqan BQO turǵyny ustaldy.
Bul týraly aqparatty QR AShM Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Feısbýktegi paraqshasynda jarııalady, dep habarlaıdy «QazAqparat» HAA tilshisi.
«2017 jyldyń 2 qarashasy kúni «Ohotzooprom ÓB» RMQK Oral aımaqtyq fılıalynyń Qaztalov tirek pýnktiniń ınspektorlary BQO ІІD qyzmetkerlerimen, SQO ІІD tabıǵat qorǵaý jónindegi polıtsııa qyzmetkerlerimen birge reıd júrgizgen. Reıd barysynda saǵat túngi 03:00 shamasynda Oral - Atyraý tas jolynda «Lada Kalına» markaly avtokólik toqtatylǵan. Onda otyrǵan Oral qalasynyń turǵynynyń avtokóligin tekserý barysynda qapqa salynǵan kıiktiń 80 múıizi tabyldy», - delingen habarlamada.
Atalǵan is boıynsha materıaldar BQO ІІD-ne tergeý júrgizý úshin tapsyryldy.
«Qosymsha aqparat keıin habarlanatyn bolady», - deıdi Sáken Dildahmet Feısbýk paraqshasynda.
