BQO turǵyny bas úıitemin dep kúıip qaldy
ORAL. QazAqparat – Batys Qazaqstan oblysynda turǵyn qoıdyń basyn úıitemin dep júrip kúıip qaldy, dep habarlaıdy QazAqparat tilshisi.
BQO Tótenshe jaǵdaı departamentiniń baspasóz qyzmetinen túsken málimetke qaraǵanda, oqıǵa 31 shilde kúni saǵat 20.10-da Báıterek aýdany Mıchýrın aýylynda boldy.
Komsomol kóshesi 62B-mekenjaıynda turatyn 1956 jylǵy turǵyn gaz ballonynyń kómegimen qoıdyń basyn úıitken. Órt qaýipsizdigi erejesin saqtamaý saldarynan ballonnyń shlangisi shyǵyp ketip, er adam 2-3 dárejeli kúıik jaraqatyn alǵan. Aıaqtary, arqasy, keýdesi, beti kúıgen.
Denesiniń 50 paıyzyn kúıik shalǵan turǵyn qalalyq kópbeıindi aýrýhanaǵa jatqyzyldy.
Oblystyq densaýlyq saqtaý basqarmasy baspasóz qyzmetiniń naqtylaýynsha, denesiniń 50-55 paıyzyn kúıik shalǵan er adamnyń jaǵdaıy aýyr. Degenmen esin biledi, suraqtarǵa jaýap beredi.
