BQO turǵyny aýyldasyn araq úshin uryp óltirdi
ORAL. QazAqparat - BQO qylmystyq ister jónindegi mamandandyrylǵan aýdanaralyq soty QR QK 99-baby 1-bóligi, 188-baby 1-bóligimen aıyptalǵan M.Ismaǵulovqa qatysty iske núkte qoıdy, dep habarlaıdy «QazAqparat» tilshisi.
Sot tóraǵasy Qaırat Shalqarovtyń málim etkenindeı, ótken jyldyń 23 tamyzy kúni shamamen saǵat 23.00-de M.Ismaǵulov K.Malaevanyń úıine kelip, araqqa aqsha suraǵan. Ony K.Malaeva «sańyraý, esýas» dep, qýyp jiberýge tyrysqan. Muny ar-namysyma tıdi dep uqqan M.Ismaǵulov belgisiz zatty K.Malaevaǵa laqtyrǵan kezde ol jerge qulaǵan. Budan keıin M.Ismaǵulov adam óltirý maqsatymen K.Malaevany úıge súırep kirgizip, basynan taıaqpen keminde tórt ret urǵan. Sonyń saldarynan marqum oqıǵa ornynda kóz jumǵan.
M.Ismaǵulov 4800 teńge aqsha, quny 100 myń teńge turatyn «Dell» noýtbýgyn jymqyryp, esikti syrtynan kilttep, oqıǵa ornynan boı tasalaǵan.
Sot úkimimen M.Ismaǵulov QR QK 99-baby 1-bóligi, 188-baby 1-bóligi, 58-baby 3-bóligine sáıkes aıypty dep tanylyp, 11 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Sot úkimi zańdy kúshine engen joq.
