BQO turǵyny 700 kg astam bekire tuqymdas balyqpen ustaldy

ORAL. QazAqparat – Batys Qazaqstan oblysynyń turǵyny 700 kg astam bekire tuqymdas balyqpen ustaldy, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkenindeı, oqıǵa 8 jeltoqsan kúni shamamen saǵat 05.30-da Zachagan kentinde boldy.

Jedel is-sharalar júrgizý barysynda Aqjaıyq aýdanynyń 38 jastaǵy turǵyny aıdap kele jatqan «Toıota» avtokóliginiń salonynan 400 keliden astam bekire tuqymdas

balyq shyqty.

Sonymen qatar atalǵan kenttegi mekenjaıdy tekserý barysynda 300 kg astam bekire tuqymdas balyq alyndy.

Qazirgi kezde QR QK 339-babyna (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes sotqa deıingi tergeý amaldary júrgizilýde.

Bul bap boıynsha aıypty dep tanylǵan adam múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan bes jylǵa deıingi merzimge aıyra otyryp, úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna, ne segiz júz saǵatqa deıingi merzimge qoǵamdyq jumystarǵa tartýǵa, ne úsh jylǵa deıingi merzimge bas bostandyǵyn shekteýge, ne sol merzimge bas

bostandyǵynan aıyrýǵa jazalanady.

Eske sala keteıik, budan buryn BQO-da gaz aýa qospasy jarylyp, eki adamnyń kúıik jaraqatyn alǵanyn jazǵan bolatynbyz.