BQO turǵyny 70 dana kıik múıizimen ustaldy
ORAL. QazAqparat - Qaztalov aýdanynda turǵyn 70 dana kıik múıizimen ustaldy, dep habarlaıdy QazAqparat tilshisi.
Aýdandyq polıtsııa bóliminiń bastyǵy Renat Degenbaevtyń aıtýynsha, oqıǵa búgin saǵat 03.00 shamasynda aýdan ortalyǵy Qaztalov aýylynda oryn aldy. Táýelsizdik kóshesi boıynda kúdikti kóringen «Nıva» avtokóligin toqtatyp, teksergen kezde onyń salonynan qorapqa salynǵan 70 dana kıik múıizi tabylǵan. Avtokólikte bir adam bolǵan.
Osy derekke baılanysty jedel tergeý toby qurylyp, ol oqıǵa ornynda jedel izdestirý sharalaryn júrgizdi. Bireýler jazyq dalada júrgen 35 kıikti qasaqana atyp óltirip, múıizin paıda tabý maqsatynda kesip alyp, ushasyn laqtyryp ketken.
Qylmysqa qatysy bar kúdikti retinde kórshiles Jánibek aýdany ortalyǵy Jánibek aýylynyń turǵyny ustaldy.
Qazirgi kezde QR QK 339-babyna sáıkes (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) tergeý amaldary júrgizilýde.
Aıta keteıik, bıylǵy sanaq boıynsha Batys Qazaqstan oblysynda kıik sany 217 myńǵa jetken bolatyn. Óńirde kıikter negizinen Qaztalov, Jánibek aýdandaryn mekendeıdi.
