BQO turǵyny 380 kg ózen shaıanymen ustaldy
ORAL. QazAqparat – Batys Qazaqstan oblysynyń turǵyny 380 kılo ózen shaıanymen ustaldy, dep habarlaıdy QazAqparat tilshisi.
Qaztalov aýdany polıtsııa bóliminiń ýchaskelik polıtsııa ınspektory, polıtsııa kapıtany Merjan Tileýbaevtyń málim etkenindeı, oqıǵa 13 qazan kúni Jalpaqtal aýyly Baıqońyr kóshesinde boldy.
Saǵat 23.30-da Jalpaqtal polıtsııa bóliminiń qyzmetkerleri «Brakoner» jedel aldyn alý sharasy barysynda 28 jastaǵy S. degen júrgizýshi aıdap kele jatqan VAZ-21713 avtokóligin toqtatty.
Teksergen kezde avtokólik salonynan 35 qapqa salynǵan 10919 dana, jalpy salmaǵy 379,95 kg ózen shaıany tabyldy.
Qazirgi kezde QR QK 335-baby 1-bóligine (balyq resýrstaryn, basqa da sý janýarlaryn nemese ósimdikterin zańsyz alý) sáıkes sotqa deıingi tergeý amaldary júrgizilýde.
Óńirde tabıǵat qorǵaý zańnamasyn buzýshylyqty, bıoresýrs nysandary men ónimderiniń zańsyz aınalymyn anyqtaý jáne jolyn kesý, ekologııalyq qylmystardy ashý baǵytynda 12 qazan men 11 qarasha aralyǵynda «Brakoner» jedel aldyn alý sharasy ótkizilýde.
Eske sala keteıik, budan buryn oraldyq turǵynnyń úı alamyn dep jınaǵan 5 mln teńgesiniń qoldy bolǵanyn jazǵan edik.
