BQO turǵyndary salyqqa 358 mln teńgeden astam qaryzdar
BQO boıynsha memlekettik kirister departamentiniń basshysy Baýyrjan Aınabekovtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 279,3 mln teńgesi nemese 77 paıyzy kólik salyǵyna tıesili.
Departament basshysynyń aıtýynsha, 2 qazannan bastap boryshkerlerge jeke tulǵalardyń salyq bereshegi týraly habarlama jiberiletin bolady.
Habarlama tapsyrylǵan soń otyz jumys kúninen keıin salyq tólenbese, 1 AEK-ten astam bereshekti májbúrlep óndirý týraly salyq buıryǵy jiberiledi, ol 5 jumys kúninen keıin jeke sot oryndaýshylaryna beriledi.
Bul rette jeke sot oryndaýshylary bereshek somasynan basqa shottarǵa tyıym salý jáne shyǵýǵa shekteý qoıýdy aıtpaǵanda, bereshek somasynyń 25 paıyzyna deıingi mólsherde qosymsha tólem óndirip alady. Sondyqtan artyq shyǵyndarǵa urynbaý úshin múlik salyǵyn ýaqtyly tóleý qajet.
B.Aınabekovtiń sózine qaraǵanda, salyqty e-Salyq Azamat mobıldi qosymshalary jáne ekinshi deńgeıdegi bankter, «Elektrondy úkimet» portaly, bank bólimshelerindegi nemese tólem termınaldaryndaǵy qolma-qol, sondaı-aq bank kartalarymen tóleýge bolady.
«Oblys boıynsha barlyǵy 210 634 jeke tulǵa tirkelgen, olardyń menshiginde 258 703 salyq salý nysany bar. Ótken jyly múlik jáne jer salyǵy 471 mln teńge kóleminde esepteldi. Kúni búgin 153 131 adam nemese salyq tóleýi tıisti turǵyndardyń 72,7 paıyzy tólem jasady. Olardan bıýdjetke 342,5 mln teńge tústi. Jyljymaly jáne jer telimi menshik ıeleriniń múlik salyǵyn tóleý merzimi 1 qazanda aıaqtalady. Sondyqtan osy merzimge deıin tólep úlgerý kerek», dedi B.Aınabekov.
