BQO turǵynynyń sal aýrýyna shaldyqqany anyqtaldy

ORAL. KAZINFORM —  Batys Qazaqstan oblysynda bıylǵy birinshi toqsanda  asa qaýipti ınfektsııalar – tyrysqaq, oba, qutyrý, sibir jarasy, sondaı-aq dıfterııa, qyzamyq, ish súzegi, polıomıelıt, sirespe jáne bezgek derekteri tirkelgen joq.

BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń óńirlik kommýnıkatsııa qyzmeti alańynda ótken brıfıngte málim etkenindeı, óńirde 18 juqpaly aýrý boıynsha syrqattanýshylyqtyń tómendeýi baıqalady. Atap aıtqanda, salmonellez 4,5 esege, jelsheshek 2 eseden astam, tumaý 5 esege, jiti vırýsty gepatıtter, JRVI 34,2 paıyzǵa azaıdy.

Dınara Oljabaıqyzynyń sózine qaraǵanda, birqatar ınfektsııalar boıynsha ósim tirkelip otyr. Eń aldymen qyzylsha boıynsha epıdemıologııalyq jaǵdaı kúrdeli. Birinshi toqsanda 223 adam aýyryp, ótken jylmen salystyrǵanda, aıtarlyqtaı kóbeıgen. Aýyrǵandardyń 90 paıyzy – ekpe almaǵandar.

- Sondaı-aq kókjótel, jiti ishek ınfektsııalary, brýtsellez, skarlatına, týberkýlez, lıamblıoz jáne keıbir parazıttik aýrýlar boıynsha ósim baıqalady. 2026 jyldyń birinshi toqsanynda oblysta 1 adamnyń jiti sylbyr sal aýrýyna shaldyqqany tirkeldi. Bul derek Aqjaıyq aýdanynda anyqtaldy, - dedi D.Jańabergenova.

Onyń aıtýynsha, oblysta profılaktıkalyq ekpelermen qamtý deńgeıi jetkiliksiz. Jańa týǵan nárestelerdi BTsJ vaktsınasymen qamtý – 93,6 paıyz, al V vırýsty gepatıtine qarsy 93,7 paıyz boldy. Bul kórsetkishter usynylǵan deńgeıden tómen.

- Sol sekildi 1 jáne 2 jasqa deıingi balalardy negizgi ınfektsııalarǵa qarsy vaktsınatsııalaý men revaktsınatsııalaý deńgeıi tómen kúıinde qalyp otyr. Bul jaǵdaı qyzylsha sııaqty ınfektsııalardyń taralýyna tikeleı áser etip otyr. Osyǵan baılanysty qosymsha ımmýndaý sharalaryn júrgizý jalǵasyp jatyr, - dep qosty departament basshysy.

Eske sala keteıik, budan buryn Batys Qazaqstanda 400-den astam adamdy ıt qapqanyn jazǵan bolatynbyz.