BQO turǵynynan 2 myńǵa jýyq lıtr zańsyz spırt ónimi tárkilendi
ORAL. KAZINFORM — Oral qalasy turǵynynan tıisti qujattary joq 2 myńǵa jýyq lıtr spırt ónimi tárkilendi.
BQO polıtsııa departamentiniń baspasóz qyzmetinen málim etkenindeı, Oralda polıtsııa qyzmetkerleri «Ssang Yong» avtokóligin toqtatqan.
Qala turǵyny aıdaǵan avtokólik salonynan spırt quıylǵan syıymdylyǵy 5 lıtrden 30 plastıkalyq bótelke tabylǵan.
«Júrgizýshiniń úıin qaraǵan kezde aýlada turǵan «Nıva» avtokóliginen taǵy 40 plastıkalyq bótelke shyqty. Oǵan qosa úıden 299 bótelke spırt tabyldy. Tıisti qujattary joq barlyǵy 1 845 lıtr spırt ónimi tárkilendi. Onyń quny keıin anyqtalatyn bolady. Oraldyq turǵynnyń oblys aýmaǵynda atalmysh ónimdi zańsyz ótkizýmen aınalysqany belgili boldy. Atalǵan derek boıynsha sotqa deıingi tergeý amaldary júrgizilýde. Polıtsııa departamenti alkogol jáne temeki ónimderiniń zańsyz aınalymy azamattardyń densaýlyǵyna qaýip tóndirip, ýlanyp qalý jáne basqa zardaptarǵa soqtyrýy múmkin ekendigin eske salady», — dep habarlady vedomstvodan.
Eske sala keteıik, budan buryn BQO-da sońǵy 5 jylda otbasylyq-turmystyq qylmystardyń úsh esege óskenin jazǵan bolatynbyz.
