BQO turǵynyna 1,2 mln teńge nesıe rásimdegen alaıaq sottaldy

ORAL. KAZINFORM – Batys Qazaqstan oblysynda  turǵynnyń atyna 1 mln 250 myń teńge nesıe rásimdegen alaıaq sottaldy.

BQO prokýratýrasynyń baspasóz qyzmetinen málim etkenindeı, Bókeı ordasy aýdandyq sotynyń úkimimen aqparattyq júıeni paıdalanýshynyń senimin teris paıdalaný jolymen ınternet alaıaqtyǵyn jasaǵan oblys turǵynyna QR QK 190-baby 2-bóligi 4-tarmaǵyna sáıkes 2 jyl merzimge bas bostandyǵyn shekteý túrindegi jaza kesildi.

Sot jaza taǵaıyndaý kezinde sottalýshynyń jas balalarynyń bar ekenin jáne qylmystyq quqyq buzýshylyq saldarynan keltirilgen múliktik zalaldyń erikti túrde ótelgenin eskergen.

- Sotta anyqtalǵanyndaı, alaıaq óziniń turmystyq qaryzdarynan qutylý maqsatynda «Teshnodom», «Home Credit Bank», «Kaspi Bank», «Jusan Bank» mobıldi qosymshalaryn paıdalanǵan. Sol arqyly aqparattyq júıeni paıdalanatyn oblys turǵynyn aldap, senimine kirip, onyń atyna 1 mln 250 myń teńgege nesıeler rásimdep, múliktik zalal keltirgen. Bókeı ordasy aýdanynyń prokýratýrasy alaıaqtyq qylmystardyń aldyn alý jáne olarǵa qarsy is-qımyl boıynsha josparly jumys júrgizýde, - dep habarlady vedomstvodan.

Eske sala keteıik, budan buryn Oralda kólikti mas kúıde aıdaǵan 160-tan astam júrgizýshi sottalǵanyn jazǵan bolatynbyz.