BQO turǵyny jasyryn zerthanada quramynda esirtki bar ósimdik ósirgen

ORAL. KAZINFORM — «Qarasora» jedel aldyn alý is-sharasy barysynda Batys Qazaqstan oblysynda tyıym salynǵan ósimdikterdi ósiretin jasyryn zerthana anyqtalyp, joıyldy.

BQO polıtsııa departamentiniń baspasóz qyzmetinen málim etkenindeı, polıtsııa qyzmetkerleri Báıterek aýdanynyń 59 jastaǵy turǵynynyń úıine tintý júrgizgen.

Tekserý barysynda sur-jasyl tústi, ózine tán ıisi bar qarasora tuqymdasyna jatatyn ósimdikke uqsas eki túp tabylyp, tárkilendi. Sonymen qatar úı aýlasynan dıodty jaryqpen, jeldetkishpen, elektr qýatyn berýge arnalǵan taımermen jabdyqtalǵan jáne qabyrǵalary arnaıy qaptalǵan fıtozerthana anyqtaldy.

- Bólmeni qaraý kezinde tártip saqshylary ósimdik tektes jemisteri bar bir úlken qorap pen japyraqtary men butalary salynǵan eki polıetılen qapty tárkiledi. Saraptama nátıjesinde bul zattardyń qarasora tuqymdas ósimdikter bolýy múmkin ekeni anyqtaldy. Atalǵan derek boıynsha sotqa deıingi tergeý amaldary júrgizilip jatyr, - dep habarlady vedomstvodan.

Batys Qazaqstan oblysynyń polıtsııa departamenti quramynda esirtki zaty bar ósimdikterdi zańsyz ósirip, saqtaǵan adamnyń Qazaqstan Respýblıkasynyń zańnamasyna sáıkes qylmystyq jaýapkershilikke tartylatynyn eske salady.

Eske sala keteıik, budan buryn Oralda esirtki ósiretin jasyryn fıtozerthana joıylǵanyn jazǵan bolatynbyz.

Sondaı-aq Oral qalasynyń turǵynynan 12 kılogramm esirtki tárkilendi.