BQO turǵyny jaǵymsyz ısi bar jıhaz úshin satýshydan 2,6 mln teńge óndirip aldy
ORAL. KAZINFORM — Oral qalasynyń № 2 sotynda kásipker men tutynýshy arasynda týyndaǵan daýǵa qatysty sheshim shyǵaryldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, áıel 2025 jylǵy mamyr aıynda satýshydan quny 948,4 myń teńge bolatyn jumsaq jıhazdy (dıvan jáne eki kreslo) satyp alǵan.
Onyń sózine qaraǵanda, taýar 2025 jylǵy 10 maýsymda jetkizilgen. Jylytý maýsymy bastalǵannan keıin jıhazdan jaǵymsyz ıis shyǵyp, ony turmysta paıdalanýǵa múmkindik bolmaǵan. Osyǵan baılanysty tutynýshy satýshyǵa taýar úshin tólengen aqshany qaıtarý týraly talap qoıyp, jazbasha narazylyq joldaǵan.
Satýshy jıhazǵa komıssııalyq tekserý uıymdastyryp, onyń qorytyndysy boıynsha ıistiń bar ekeni rastalmaǵan. Osyǵan baılanysty tutynýshyǵa aqshany qaıtarýdan bas tartylǵan. Keıin tutynýshy jıhazdy satýshynyń dúkenine aparyp, sol jerde qaldyrǵan.
Odan keıin talapker sotqa júginip, satýshyny taýardyń qunyn qaıtarýǵa, aıypaqy tóleýge jáne moraldyq zııandy óteýge mindetteýdi suraǵan. Óz kezeginde satýshy qarsy talap aryz bergen.
Sot talqysyna Densaýlyq saqtaý mınıstrligi Sanıtarııalyq-epıdemıologııalyq baqylaý komıteti «Ulttyq saraptama ortalyǵy» RMK-nyń BQO boıynsha fılıalynyń mamany qatysqan.
Fılıal mamanynyń túsindirýinshe, aýadaǵy atseton, tolýol, fenol jáne formaldegıdtiń mólsherine zerthanalyq ólsheýler júrgizilgen. Zertteý nátıjeleri atalǵan hımııalyq zattardyń shekti ruqsat etilgen mólsherden aspaǵanyn kórsetken. Maman daýly jıhazdan ıistiń shyǵatynyn rastaǵanymen, onyń tabıǵatyn anyqtaı almaǵan. Osyǵan baılanysty ol tıisti zertteýler júrgizý úshin toksıkologııalyq zerthanaǵa júginýdi usynǵan.
Jaýapker komıssııalyq tekserý aktisinde ıistiń bar ekeni anyqtalmaǵanyn, sondaı-aq talapker óndiristik aqaýdy rastaıtyn saraptama qorytyndysyn usynbaǵanyn alǵa tartqan. Sonymen qatar tutynýshyny jıhazdy alyp ketýge mindetteýdi jáne ony saqtaý shyǵyndaryn óndirýdi suraǵan. Alaıda sot bul ýájderdi negizsiz dep tanydy.
«Tutynýshylardyń quqyqtaryn qorǵaý týraly» Zańynyń 17-babynyń 2-tarmaǵyna sáıkes, eger taýarǵa kepildik merzimi belgilense, tutynýshy taýardyń kemshilikterine baılanysty talaptardy kepildik merzimi ishinde qoıýǵa quqyly. Eger shartta ózgeshe kózdelmese, kepildik merzimi taýar satyp alýshyǵa berilgen kezden bastap esepteledi.
Sondaı-aq QR Azamattyq kodeksi 429-babynyń 2-tarmaǵyna sáıkes, eger satýshy taýardyń sapasyna kepildik bergen bolsa, ol taýardaǵy kemshilikter úshin jaýap beredi.
Osylaısha, zańnama kepildik merzimi ishinde anyqtalǵan aqaýlar boıynsha óndiristik kemshiliktiń joq ekenin jáne satýshynyń kinásizdigin dáleldeý mindetin tikeleı satýshynyń ózine júkteıdi.
— Іsti qaraı kele, sot satýshydan tutynýshynyń paıdasyna taýardyń quny retinde 948,4 myń teńge, oǵan qosa 1 mln 659,7 myń teńge aıypaqy, 50 myń teńge moraldyq zııan jáne 11 467 teńge memlekettik bajdy tóleýge baılanysty sot shyǵynyn óndirdi. Sot sheshimi kúshine engen joq. Satýshy BQO sotynyń azamattyq ister jónindegi sot alqasyna apellıatsııalyq shaǵym berýge quqyly, — dedi Elmıra Qımatova.
Eske salaıyq, budan buryn BQO-da 90-nan astam kásipkerdiń saýda baǵasyn asyryp satqany belgili bolǵanyn jazǵan edik.
