BQO turǵyny úıin apatty jaǵdaıda dep tanýdy talap etti – ákimdik jaýap berdi

ORAL. KAZINFORM – Terekti aýdany Podstepnyı aýylynyń turǵyny Saıd-Hýsan Ahmaev sýǵa ketken úıin apatty jaǵdaıda dep tanýdy talap etti.

Instagram áleýmettik jelisinde turǵyn málim etkenindeı, komıssııa úıdi súrý jóninde qorytyndy shyǵarǵan, alaıda bul akti joǵalyp ketken. Sol sebepti ol osy jaǵdaıdy qaıta qarap, úıin apatty dep taný týraly oblys ákiminen kómek surap, shaǵymdandy.

Terekti aýdany ákimdiginen túsken málimetke qaraǵanda, Podstepnyı aýyly Alashorda kóshesi 7 jáne Komsomol 1-mekenjaıynda bir aýlada eki turǵyn úı bar.

«Negizgi turǵyn úı boıynsha jóndeý jumystaryna 1 mln 477 myń 466 teńge jáne múliktik shyǵyndaryn óteýge 417 myń teńge kóleminde qarajat tólendi. Alashorda, 7 mekenjaıynda ornalasqan úı tehnıkalyq baqylaýdyń saraptamalyq qorytyndysy negizinde jóndeýge jatady. Alaıda atalǵan turǵyn úı ıesi Saıd-Hýsan Ahmaev úıin apattyq jaǵdaıda dep tanýdy talap etip otyr. Qazirgi tańda komıssııa sheshimimen kelispegen jaǵdaıda onyń joǵary turǵan organǵa nemese sotqa júginýge quqyǵy bar. Bul jóninde aýdan ákiminiń orynbasary Erlan Amandyqov úı ıesine túsindirdi», - dep habarlady vedomstvodan.

Eske sala keteıik, budan buryn Oralda baspanasy sýǵa ketken saıajaı turǵyndaryna 62 úı berilgenin jazǵan bolatynbyz.