BQO turǵyny tisin sapasyz emdegen klınıkadan 1,2 mln teńge óndirip aldy

ORAL. KAZINFORM — Oral qalasynyń № 2 sotynda áıeldiń talap aryzy boıynsha azamattyq is qaraldy.

BQO sotynyń baspasóz qyzmetinen málim etkenindeı, atalǵan áıel 1 mln 949 myń materıaldyq, 3 mln teńge moraldyq shyǵyn jáne oǵan qosa 1,1 mln teńge shyǵyndardy óndirýdi talap etken.

Málim bolǵanyndaı, áıel 2022 jyldyń mamyr aıynda jeke tis emdeý klınıkasyna júgingen. Sol jerde jaqtyń joǵarǵy bóligindegi tisterdi tsırkonııalyq koronka qoldaný arqyly protezdeý jáne jalǵan vınır jolymen tistiń pishini men túsin jóndeý qyzmeti kórsetilgen. Soǵan áıel 700 myń teńge tólegen. Biraq sapasyz qyzmet saldarynan ol basqa klınıkaǵa baryp, onda 1 mln 249 teńgeniń qyzmeti kórsetilgen.

«2022 jyldyń shildesinde talapker QR Densaýlyq saqtaý mınıstrligi medıtsınalyq jáne farmatsevtıkalyq baqylaý komıteti Almaty qalasy boıynsha departamentine jaýapkerdiń sapasyz qyzmeti negizinde júgindi. Anyqtalǵan buzýshylyqtarǵa baılanysty atalǵan departament buzýshylyqtardy joıý týraly uıǵarym shyǵardy. Іsti qaraý barysynda jaýapkerdiń buzýshylyqtary departament uıǵarymy men basqa adamdardyń túsinikterimen kýálanyp, óz dálelin tapty. Sonyń negizinde sot talapty ishinara qanaǵattandyryp, klınıkadan 700 myń teńge materıaldyq, 500 myń teńge moraldyq shyǵyndy óndirdi, talaptyń qalǵan bóligi qanaǵattandyrýsyz qaldyryldy. Sheshim zańdy kúshine endi», dep habarlady vedomstvodan.

Eske sala keteıik, budan buryn BQO-da kásipkerdi aldaǵan memlekettik qyzmetshige 5 mln teńge aıyppul salynǵanyn jazǵan bolatynbyz.