BQO turǵyny sot arqyly zeınetaqysyn qaıta eseptetip aldy
ORAL. KAZINFORM — Oral qalasynyń 65 jastaǵy turǵyny budan eki jyl buryn ýákiletti organǵa jasyna baılanysty zeınetaqy taǵaıyndaý týraly ótinishpen júgingen.
BQO sotynyń baspasóz qyzmetinen málim etkenindeı, oǵan 2020 jylǵy mamyrdan 2023 jylǵy sáýirge deıingi kezeńdegi ortasha aılyq tabysy boıynsha zeınetaqy taǵaıyndalǵan.
Keıin zeınetker jumys berýshiniń 2023 jyldyń sáýir-tamyz aılary aralyǵynda BJZQ-ǵa mindetti zeınetaqy jarnalaryn aýdarýdy keshiktirgenin bilip, dereý zeınetaqy mólsherin qaıta qaraýǵa aryz jazǵan.
Ýákiletti organ oǵan aryz berýshiniń ózi erikti túrde eń qolaıly úsh jyldyq kezeńdi tańdaǵanyn, ol zeınetaqy mólsherin esepteý úshin negiz retinde alynǵanyn túsindirip, odan bas tartqan.
Alaıda bastapqy tańdalǵan kezeń taǵaıyndalǵan tólemniń jalpy somasynyń tómendeýine aıtarlyqtaı áser etken. Bas tartýmen kelispegen er adam sotqa júgindi.
Birinshi satydaǵy sot ýákiletti organdy talap qoıýshynyń buzylǵan quqyqtaryn qalpyna keltirýge mindetteı otyryp, talap aryzdy qanaǵattandyrdy.
Talap qoıýshy 20 jyl boıy avtokólik kásipornynyń júrgizýshisi bolyp úzdiksiz jumys istegen jáne jasy boıynsha zeınetaqyny tolyq kólemde alýǵa quqyǵy bar. Jumys berýshiniń zeınetaqy jarnalarynyń ýaqtyly tólenbeýine qatysty buzýshylyqtary zeınetker-aryz berýshiniń quqyqtaryn shekteýge negiz bolmaýy tıis. Aryz berýshige 2023 jyly zeınetaqy taǵaıyndaý kezinde ýákiletti organ onyń 2023 jylǵy sáýir-tamyz aılaryndaǵy kiristeri men jarnalary týraly habardar bolǵan, osyǵan baılanysty qaıta esepteýden bas tartý zeınetkerdiń zańdy quqyqtary men múddelerin shekteıdi.
— Aryz berýshi kórsetken 2020 jylǵy qyrkúıekten 2023 jylǵy tamyzǵa deıingi kezeń tólemder somasyn esepteý úshin eń qolaıly bolyp tabylady jáne ony ýákiletti organ eskerýi tıis edi. Apellıatsııalyq shaǵymda ýákiletti organnyń QR Ákimshilik rásimdik-protsestik kodeksiniń 14-babynyń talaptaryn buza otyryp, talap qoıýshynyń quqyqtaryn qorǵaýdy qamtamasyz etpegeni kórsetilgen. Batys Qazaqstan oblystyq soty birinshi satydaǵy sottyń tujyrymymen kelisti. Joǵarǵy sot ta sot aktilerin ózgerissiz qaldyrdy, — dep habarlady vedomstvodan.
Eske sala keteıik, budan buryn BQO-da 290-nan astam kıik múıizin zańsyz saqtaǵan turǵynnyń sottalǵanyn jazǵan edik.