BQO turǵyny sapasyz onlaın-kýrs qarjysyn sot arqyly qaıtaryp aldy
ORAL. KAZINFORM — Batys Qazaqstan oblysynyń turǵyny onlaın-kýrstyń sapasyz bolǵanyn bilgennen keıin sotqa júgindi.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, atalmysh turǵyn ótken jyldyń 12 qyrkúıeginde 12 aıǵa eseptelgen, quny 389 990 teńge turatyn kýrsty satyp alǵan. Ony bank arqyly rásimdegen.
Bes kúnnen keıin kýrstyń talapqa saı emestigine kózi jetken turǵyn kásipkerlik nysanyna kelisim-shartty úzip, qarjyny qaıtarý jóninde shaǵym túsirgen. Alaıda kompanııa aqshany qaıtarý kýrsqa kiriskenge deıin múmkin bolatynyn, qyzmettiń tolyq kólemde kórsetilgenin alǵa tartyp, talapty oryndaýdan bas tartqan.
Budan keıin tutynýshy sotqa talap aryz bergen, sot otyrysyna departament úshinshi tarap retinde qatysqan.
Talap aryzqa sáıkes onlaın-kýrs shartqa saı kelmegen. Biregeı oqytý baǵdarlamasynyń ornyna ınternettegi tegin materıaldardyń siltemeleri usynylǵan. Kompanııanyń óz júıesi men tuǵyrnamasy joq bolyp shyqqan.
- Oral qalasy № 2 sotynyń sheshimimen tutynýshynyń talap aryzy qanaǵattandyrylyp, kásipkerlik nysanyna onlaın-kýrs qarjysyn tolyq kólemde qaıtarý mindetteldi. Áıtse de buǵan kelispegen kýrsty uıymdastyrýshylar apellıatsııalyq shaǵym túsirdi. BQO soty azamattyq ister jónindegi sot alqasy kompanııa shaǵymyn qanaǵattandyrýdan bas tartyp, sheshimdi kúshinde qaldyrdy. Departament tutynýshylarǵa onlaın-kýrsty tańdaǵan kezde muqııat bolyp, kelisim-shartty úzý, qarjyny qaıtarý sharttaryn bilip alý qajettigin eske salady, - dedi E.Qımatova.
Eske sala keteıik, budan buryn Oralda ımporttyq jumyrtqany zańsyz satý derekteri anyqtalǵanyn jazǵan edik.
Sondaı-aq Batys Qazaqstanda kásipkerdiń sút baǵasyn asyryp satqany belgili boldy.
