BQO turǵyny avtosalonnan sapasyz kólik úshin tólengen 9,6 mln teńgesin qaıtaryp aldy
ORAL. KAZINFORM — Batys Qazaqstan oblysynda saýda qyzmetin retteý salasynda 144 ákimshilik quqyq buzýshylyq deregi tirkeldi.
BQO boıynsha saýda jáne tutynýshylar quqyǵyn qorǵaý departamentiniń basshysy Elmıra Qımatovanyń óńirlik kommýnıkatsııalar qyzmeti alańynda ótken brıfıngte málim etkenindeı, QR Ákimshilik quqyq buzýshylyq týraly kodeksiniń 204-4-baby 1 jáne 2-bóligine sáıkes 132 is qozǵaldy.
Elmıra Nurqyzynyń sózine qaraǵanda, áleýmettik mańyzy bar azyq-túlik taýarlaryn satý kezinde 15 paıyzdyq saýda ústemesin asyryp jibergen satýshylarǵa 83 eskertý berilip, 49-yna aıyppul salyndy.
Sondaı-aq baǵanyń teńgemen kórsetilmeýi jáne ishki ne syrtqy vıtrınalardaǵy baǵadan taýar baǵasynyń asyp ketýine baılanysty kodekstiń 193-baby 4 jáne 5-bóligine sáıkes 10 ákimshilik is qozǵalyp, aıyppuldar salyndy.
E.Qımatovanyń aıtýynsha, zańnamaǵa sáıkes departament tutynýshylar quqyǵyn qorǵaý boıynsha azamattyq isterge úshinshi tulǵa retinde qatysýǵa, sondaı-aq sotqa talap aryz joldaýǵa quqyly.
Bıyl 18 tutynýshy jıhaz daıyndaý jáne ornatý qyzmetin kórsetetin «Modern Plıýs» JK-ne qatysty departamentke shaǵym túsirdi. Tutynýshylar qarajat aýdarǵanymen, jıhaz belgilengen merzimde jetkizilmegen, aqsha qaıtarylmaǵan. Osyǵan baılanysty departament tutynýshylardyń múddesin qorǵaý maqsatynda Batys Qazaqstan oblysynyń mamandandyrylǵan aýdanaralyq ekonomıkalyq sotyna talap aryz joldady. Talaptar – tutynýshylarmen kelisim-sharttardy buzý jáne kórsetilmegen qyzmet úshin tólengen aqshany qaıtarý. Qazirgi kezde is sot óndirisinde qaralýda.
- Departamentke taǵy bir tutynýshy júgindi. Ol 9 mln 690 myń teńge kóleminde bankten nesıe rásimdep, qaladaǵy avtosalondardyń birinen kólik alǵan. Alaıda dosymen birge kólikti tekserý kezinde radıatorda maıdyń aǵyp turǵany, kapot bolttarynyń ústindegi boıaýdyń ketýi sııaqty aqaýlar anyqtaldy. Qalyńdyqty ólsheıtin qurylǵyny qoldanǵanda, kóliktiń oń jaqtaǵy aldyńǵy esigine qaıta boıaý jasalǵany belgili boldy. Ol kóliktiń buryn jol apatyna túsken bolýy múmkin dep kúdiktenip, taýardy qaıtarýǵa sheshim qabyldady. Departament shaǵym daıyndaýda kómek kórsetti. Tutynýshy shaǵymdy avtosalonǵa aparyp berdi, bankke de nesıe kelisim-shartyn buzý týraly ótinish berdi. Nátıjesinde avtosalonmen jasalǵan kelisim-shart buzylyp, bank nesıesi joıyldy jáne barlyq aqsha qaıtaryldy, - dedi departament basshysy.
Eske sala keteıik, budan buryn BQO-da tutynýshy quqyǵyn buzǵan kásipkerge 1,5 mln astam teńge aıyppul salynǵanyn jazǵan edik.