BQO turǵyny: Aýdan ortalyǵynda tursaq ta, jolǵa zárýmiz
ORAL. KAZINFORM — Aqjaıyq aýdany ortalyǵy Chapaev aýylynyń turǵyny Abzal Esirkepov jol qatynasy nashar ekendigine shaǵymdandy.
A.Esirkepovtiń málim etkenindeı, ózi turatyn Neftebaza kóshesiniń joly otyz jyl buryn salynǵan, ábden eskirgen.
— Jolymyz shurq-tesik. Jer qurǵaq kúnderi joldyń janymen júremiz. Biraq laı bolǵan kúnderi sol shamaly asfaltpen qatynaýǵa týra keledi. Sonymen qatar uıaly baılanys máselesi de sheshilmeı tur, — deıdi A.Esirkepov.
Osy máseleniń anyq-qanyǵyna kóz jetkizý úshin Kazinform tilshisi Aqjaıyq aýdany ákimdigine arnaıy saýal joldaǵan edi.
Aýdan ákimdiginen alynǵan málimetke qaraǵanda, Chapaevtaǵy aýylishilik joldar 62,4 shaqyrym bolsa, sonyń 22,3 shaqyrymyna (35,7 paıyz) asfalt jabyny tóselgen. Al 40,1 shaqyrymy nemese 64,3 paıyzy — topyraqty jol.
Eń ózekti máseleniń biri bolyp otyrǵan aýylishilik joldardy jóndeý maqsatynda 27 kóshege (14,9 shaqyrym) 5 jobalyq-smetalyq qujattama jasaqtalyp, saraptamadan ótkizildi. Jalpy quny — 1 mlrd 974,4 mln teńge.
Atalǵan jobalarǵa sáıkes jóndeý jumystaryn júrgizý úshin tıisti oblystyq basqarmalarǵa qarajat suratylyp, bıýdjettik ótinimder joldandy. Alaıda qarajat bólinbeýine baılanysty jóndeý jumystaryn júrgizýge múmkinshilik bolmaı otyr.
— Neftebaza kóshesinde 13 turǵyn úı (24 páter) bar, adam sany — 115. Joldyń jalpy uzyndyǵy — 2,6 shaqyrym. Atalǵan kóshege kútip-ustaý, ıaǵnı qyryp-tegisteý jumystary júrgizilýde. Degenmen, joldyń negizinde eski asfalt qaldyqtary jáne qıyrshyq tas topyraqpen aralasyp jatyr. Sol sebepti joldyń negizi qatty bolǵandyqtan, júrý bóligin qalpyna keltirýde qıyndyq týǵyzyp otyr. Al qıyrshyq tas pen qum aralas qospa tóseý úshin ortasha eseppen 36 mln teńge qarajat qajet. Osyǵan oraı Neftebaza kóshesiniń jolyna jóndeý jumystaryn júrgizý úshin (asfalt jabynyn tóseý) 2024 jyly JSQ jasaqtaldy. Jalpy uzyndyǵy — 2,6 shaqyrym, quny — 406 981 myń teńge. Jobalar kezeń-kezeńmen halyq sanyna jáne respýblıkalyq, oblystyq bıýdjetten qarajat bólinýine qaraı júzege asyrylyp jatyr, — delingen resmı jaýapta.
Aýdan ákimdiginiń málimetine sáıkes uıaly baılanys máselesin sheshý maqsatynda Neftebaza kóshesinde ornalasqan «Qazaqtelekom» AQ teńgerimindegi munaraǵa baılanys júıesin ornatýǵa usynys berilgen. Alaıda mekeme talshyqty-optıkalyq baılanystyń joqtyǵyna oraı uıaly baılanys bolmaıtynyn habarlaǵan. Sondyqtan Chapaev aýylynyń kireberisine nemese kóshege jaqyn mańǵa munara ornatý múmkinshiligi mamandarmen qaralyp, tıisti jumystar júrgiziletin bolady.
Eske sala keteıik, budan buryn Batys Qazaqstanda joldyń shala-sharpy salynýyna baılanysty ákimdik jaýap bergenin jazǵan edik.
Sondaı-aq jol joqtyǵyna baılanysty BQO turǵyny alys aýyl máselesin kóterdi.