BQO turǵyny alıment tólemegeni úshin 6 aıǵa bas bostandyǵynan aıyryldy
ORAL. KAZINFORM - Batys Qazaqstan oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń 2026 jylǵy 5 mamyrdaǵy úkimimen boryshker Qazaqstan Respýblıkasy Qylmystyq kodeksiniń 139-baby (alıment tóleýden jaltarý) boıynsha kináli dep tanylyp, 6 aı merzimge bas bostandyǵynan aıyryldy.
Batys Qazaqstan oblystyq prokýratýrasy baspasóz qyzmetiniń habarlaýynsha, sotta sottalǵannyń bir jyldan astam ýaqyt boıy kámeletke tolmaǵan balasyn asyraý jónindegi sot sheshimin oryndaýdan jaltarǵany anyqtaldy. Nátıjesinde alıment boıynsha 4 mln teńge kóleminde bereshek qalyptasqan.
Buǵan deıin boryshker osyǵan uqsas quqyqbuzýshylyq úshin qylmystyq jaýaptylyqqa tartylyp, alaıda raqymshylyq aktisin qoldanýǵa baılanysty jazadan bosatylǵan. Soǵan qaramastan, istegen isinen tıisti qorytyndy jasamaı, ata-analyq mindetterin oryndaýdan jaltarýyn jalǵastyrǵan.
Sot úkimi zańdy kúshine engen joq.
Bıylǵy 4 aıda Batys Qazaqstan oblysynda alıment tóleýden jaltarǵan boryshkerlerge qatysty QK-niń 139-baby boıynsha 21 qylmystyq quqyq buzýshylyq tirkeldi. Onyń ishinde: 7 is taraptardyń tatýlasýyna baılanysty toqtatylǵan; 5 is boıynsha aıyptaý úkimderi shyǵarylǵan; qalǵan qylmystyq ister óndiriste.
Osyǵan baılanysty prokýratýra sot sheshimin oryndamaý úshin qylmystyq jaýaptylyq kózdelgenin eske salady
Osyǵan deıin Semeıde balasyna 5 mln teńge alıment tólemegen er adam sottalǵan bolatyn.
