BQO turǵyny áleýmettik jelidegi laık úshin aýyldasyn aýyr jaraqattaǵan
ORAL. KAZINFORM — Batys Qazaqstan oblysy Jánibek aýdandyq sotynda QR QK 106-baby 1-bóligine sáıkes aıyp taǵylǵan turǵynǵa qatysty úkim shyqty.
BQO sotynyń baspasóz qyzmetinen málim etkenindeı, oqıǵa bıylǵy 10 mamyrda boldy. Sottalýshy saǵat túngi 02.00 shamasynda áıeliniń Instagram áleýmettik jelisindegi paraqshasynda jarııalanǵan fotosýretterge jábirlenýshiniń unatý (laık) belgisin qoıǵanyna baılanysty janjal shyǵarǵan.
Sodan keıin onyń qýyq tusyna eki jáne jaýyryn tusyna bir ret pyshaq suqqan. Sosyn oqıǵa ornynan boı tasalaǵan. Saldarynan jábirlenýshiniń densaýlyǵyna aýyr zııan keltirilgen. Atap aıtqanda, ishki aǵzalary da zaqymdanǵan.
Sottalýshy óz kinásin tolyq moıyndap, jasaǵan isine ókinip, jábirlenýshiden keshirim suraǵan. Sondaı-aq mundaı áreketti budan bylaı qaıtalamaıtynyn aıtyp, bas bostandyǵynan aıyrmaýdy ótingen. Memlekettik aıyptaýshy sottalýshyǵa 3 jyl merzimge bas bostandyǵynan aıyrý jazasyn taǵaıyndaýdy surady.
Sot sottalýshyny QR QK-niń 106-baby 1-bóliginde kózdelgen qylmystyq quqyq buzýshylyqty jasaǵany úshin kináli dep tanyp, 3 jyl merzimge bas bostandyǵynan aıyrý jazasyn taǵaıyndady. Biraq QR QK-niń 63-babyna sáıkes jaza shartty túrde dep eseptelip, 3 jyl merzimge probatsııalyq baqylaý belgilendi. Endi ol probatsııa qyzmetin habardar etpeı turǵylyqty jerin jáne jumys ornyn ózgerte almaıdy. Sondaı-aq alkogoldik ishimdikter satylatyn qoǵamdyq oryndarǵa (kafe, barlarǵa, meıramhanalarǵa) barýǵa, túngi ýaqytta shyǵýǵa tyıym salyndy.
Sot úkimi zańdy kúshine endi.
Eske sala keteıik, budan buryn BQO-da óziniń týysyn óltirgen turǵynnyń 12 jylǵa sottalǵanyn jazǵan edik.
Sondaı-aq Oralda túrmege temeki tasyǵan kolonııa qyzmetkeri sottaldy.
