BQO turǵyny 11 mln teńge páter qunyn sot arqyly óndirip aldy
ORAL. KAZINFORM – Batys Qazaqstan oblysynda Báıterek aýdanynyń turǵyny páterdi satyp alý-satý shartyn birjaqty buzýdy zańsyz dep taný, soǵan baılanysty bereshekti jáne turaqsyzdyq aıybyn óndirip alý týraly sotqa júgindi.
BQO sotynyń baspasóz qyzmetinen málim etkenindeı, aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi 2024 jylǵy qańtarda Peremetnyı aýylynan páter satyp alýǵa habarlandyrý jarııalaǵan.
S. degen áıel konkýrs jeńimpazy retinde tanylyp, quny 10,3 mln teńge turatyn páterdi satyp alý-satý sharty, oǵan qosa úıdi qabyldaý-tapsyrý aktisi jasalǵan.
Budan keıin memlekettik organ «Azamattarǵa arnalǵan úkimet» memlekettik korporatsııasy» KEAQ BQO Báıterek aýdany boıynsha fılıalyna shartty tirkeý týraly ótinimmen júgindi. Biraq keıin ol oıynan aınyp, ótinimdi keri qaıtaryp aldy. Sosyn turǵyn úı KEAQ-ta qaıta rásimdeýden jáne tirkeýden ótpeıdi degen sebepti alǵa tartyp, shartty birjaqty tártippen buzǵan.
Shyn mánisinde jaýapker shartty tirkeý týraly atalmysh fılıalǵa ótinim bergen kezde jyljymaıtyn múliktiń biryńǵaı memlekettik kadastrynyń aqparattyq júıesinde tehnıkalyq aqaý bolǵan. Soǵan baılanysty tirkeýdi júrgizý múmkin bolmaǵan. Biraq keıin bári túzetilgen, sondyqtan shartty tirkeýge bolatyn edi.
Sot talapkerdiń memlekettik satyp alý týraly shart jasasyp, shart boıynsha óz mindettemelerin oryndaǵanyn, mámile jasaý kezinde onyń tarapynan qandaı da bir buzýshylyqtarǵa jol berilmegenin anyqtady. Osyǵan baılanysty sot talapty tolyǵymen qanaǵattandyrdy.
- Páterdi satyp alý-satý shartyn birjaqty buzý zańsyz dep tanyldy. Memlekettik organnan 10,3 mln teńge bereshek jáne páterdi satyp alý-satý sharty boıynsha 1 mln 030 myń teńge sharttyq turaqsyzdyq aıyby, sondaı-aq 115 146 teńge mólsherinde sot shyǵystary óndirildi. BQO sotynyń azamattyq ister jónindegi sot alqasy birinshi satydaǵy sheshimdi ózgerissiz qaldyrdy. Sheshim zańdy kúshine endi, - dep habarlady vedomstvodan.
Eske sala keteıik, budan buryn Oralda jas jigittiń óziniń esimi men tegin qazaqshaǵa sot arqyly ózgertip alǵanyn jazǵan edik.